တူရကီနှင့်အီရတ်နိုင်ငံတို့သည် ဆင်ဂျာ‌ဒေသရှိ PKK အကြမ်းဖက်အဖွဲ့အား အမြစ်ပြတ်ချေမှုန်းရန် စီစဉ်လျက်ရှိခြင်း

 Daily Sabah; Jan-31 (Sun)

              ကာလရှည်ကြာဖြစ်ပွားခဲ့သော အကြမ်းဖက်တိုက်ခိုက်မှုများကို အဆုံးသတ် နိုင်ရန် ခက်ခဲသော်လည်း တူရကီနိုင်ငံအနေဖြင့် နိုင်ငံအတွင်းနှင့် အီရတ်နိုင်ငံ မြောက်ပိုင်း ဆင်ဂျာ (Sinjar) ဒေသရှိ  ကာဒစ္စတန်အလုပ်သမားပါတီ (Kurdistan Workers’ Party-PKK) အမည်ခံအကြမ်းဖက်အဖွဲ့အား အပြီးသတ်တိုက်ခိုက်မှုများ ပြုလုပ်ရန်ဆုံးဖြတ်ခဲ့ကြောင်း Daily Sabah သတင်းဌာနက ဇန်နဝါရီလ ၃၁ ရက်တွင် ဖော်ပြခဲ့ပါသည်။ ထို့ပြင် တူရကီနိုင်ငံသည် အီရတ်နိုင်ငံတွင်းရှိ အကြမ်းဖက်မှုတန်ပြန် တိုက်ခိုက်ရေးလုပ်ငန်းများတွင်လည်း ဆက်လက်၍ ကူညီထောက်ပံ့ပေးသွားမည် ဖြစ်ကြောင်း ဒေသတွင်းသတင်းများက ဖော်ပြခဲ့ပါသည်။ တူရကီနှင့် အီရတ်တို့၏ မဟာဗျူဟာမြောက်အကြမ်းဖက်မှု တန်ပြန်တိုက်ခိုက်ရေး ပူးတွဲလုပ်ဆောင်ချက်များသည် PKK နှင့် IS အကြမ်းဖက်အဖွဲ့များအပေါ် အမြစ်ပြတ်ချေမှုန်းတိုက်ခိုက်ခြင်းသာမက PKK အကြမ်းဖက်အဖွဲ့၏ အဖွဲ့ခွဲများ ထပ်မံပေါ်ပေါက်လာခြင်းများအတွက်လည်း အတားအဆီးတစ်ရပ် ဖြစ်လာစေနိုင်ကြောင်း စစ်ဘက်ဆိုင်ရာကျွမ်းကျင်ပညာရှင်များ၏ ပြောကြားခဲ့ပါသည်။ အဆိုပါ မဟာဗျူဟာမြောက် အကြမ်းဖက်မှုတန်ပြန်တိုက်ခိုက်ရေး ပူးတွဲလုပ်ဆောင်ချက်များ အောင်မြင်စေရန်အတွက် အီရတ်အစိုးရနှင့် ၎င်းဒေသရှိ ကာဒစ်စတန် ကိုယ်ပိုင်အုပ်ချုပ်ရေးအဖွဲ့တို့အကြား စစ်မှန်သောကတိကဝတ်များပြုလုပ်ရန် လိုအပ်ကြောင်း စစ်ဘက်ဆိုင်ရာ ကျွမ်းကျင်ပညာရှင်များက ထပ်လောင်းပြောကြားခဲ့ ပါသည်။

          PKK အကြမ်းဖက်အဖွဲ့သည် ဒေသတွင်းမတည်ငြိမ်မှုများကို အခွင့်ကောင်း ယူပြီး ၎င်းတို့၏ အင်အားတောင့်တင်းစေရန်လုပ်ဆောင်လျက်ရှိပါသည်။ ထို့ကဲ့သို့ အင်အားဖြည့်တင်းမှုများသည် တူရကီနိုင်ငံအပါအဝင် အီရတ်နိုင်ငံနှင့် ကာဒစ္စတန် ဒေသ၏ ဆက်ဆံရေးကောင်းမွန်ခြင်းများအတွက် ကြီးမားသောခြိမ်းခြောက်မှုတစ်ရပ် ဖြစ်စေနိုင်ကြောင်း နိုင်ငံခြားရေးမူဝါဒကျွမ်းကျင်ပညာရှင်တစ်ဦးဖြစ်သည့် ကန်အကျူး (Can Acun) က ပြောကြားခဲ့ပါသည်။ လက်ရှိအချိန်တွင် PKK အဖွဲ့သည် တူရကီနိုင်ငံ၏ စစ်ဆင်ရေး‌ဆောင်ရွက်ချက်များကြောင့် ဖိအားများဖြင့်ရင်ဆိုင်နေရပြီး ၎င်းတို့၏ စစ်ရေး ဆောင်ရွက်ချက်များသည်လည်း အကန့်အသတ်ဖြင့်သာ‌ ဆောင်ရွက်နေရလျက်ရှိကြောင်း သိရှိရပါသည်။