ဥရောပသမဂ္ဂနှင့် တူရကီတို့သည် စီးပွားရေးနှင့် ရွှေ့ပြောင်းအခြေချနေထိုင်သူများ ဆိုင်ရာကိစ္စရပ်များအား ပူးပေါင်းဆောင်ရွက်သွားရန်ရှိခြင်း

Xinhua; Apr-7 (Wed)

    ဥရောပသမဂ္ဂ (EU) အနေဖြင့် ပိုမိုကောင်းမွန်သော စီးပွားရေးနှင့် ရွှေ့ပြောင်း အခြေချနေထိုင်သူများဆိုင်ရာကိစ္စရပ်များ၌ ပူးပေါင်းဆောင်ရွက်မှုများအား တိုးမြှင့်နိုင်ရန် အတွက် တူရကီနိုင်ငံနှင့် တိကျသောအစီအစဉ်များ ပြုလုပ်သွားရန်အသင့်ရှိကြောင်း ဧပြီလ ၆ ရက်တွင် EU ထိပ်တန်းအရာရှိများက ထုတ်ဖော်ပြောကြားခဲ့ပါသည်။ ဥရောပ ကော်မရှင်ဥက္ကဋ္ဌ အာဆူလာဗွန်ဒါလီရန် (Ursula von der Leyen) နှင့် ဥရောပကောင်စီ ဥက္ကဋ္ဌ ချားစ်မိုက်ကယ် (Charles Michel) တို့သည် တူရကီသမ္မတ ရီဆက်တေရစ် အာဒိုဂန် (Recep Tayyip Erdogan) နှင့် မြို့တော်အန်ကာရာ၌ တွေ့ဆုံမှုအပြီးတွင် အထက်ပါမှတ်ချက်များ ထွက်ပေါ်လာခဲ့ခြင်းဖြစ်ပါသည်။ အဆိုပါတွေ့ဆုံမှုအတွင်း တရားဥပဒေစိုးမိုးရေးနှင့် အခြေခံအခွင့်အရေးများအား လေးစားလိုက်နာခြင်းသည် ဥရောပသမဂ္ဂ၏ အဓိကတန်ဖိုးများဖြစ်ပြီး တူရကီနိုင်ငံ၏ လက်ရှိဖြစ်ပေါ်နေမှုများကိုလည်း အလေးအနက်ထားကြောင်း မိုက်ကယ်က ပြောကြားခဲ့ပါသည်။

    ဥရောပသမဂ္ဂသည် တူရကီနိုင်ငံ၏ ပို့ကုန်နှင့်သွင်းကုန်ကဏ္ဍတွင် အရေးပါသည့် မိတ်ဖက်အဖွဲ့အစည်းဖြစ်ပြီး နှစ်နိုင်ငံအကြား အကောက်ခွန်ဆိုင်ရာ အခက်အခဲများအား ဖယ်ရှားရန် အဓိကထားဆောင်ရွက်သွားမည်ဖြစ်သည့်အပြင် ကုန်သွယ်မှုတိုးမြှင့်ခြင်းနှင့် သဘောတူညီချက် အဆင့်မြှင့်တင်ခြင်းများလည်း လုပ်ဆောင်သွားမည်ဟု ဗွန်ဒါလီရန်က အဆိုပါဆွေးနွေးမှုအတွင်း ပြောကြားခဲ့ပါသည်။ ထို့ပြင် ဥရောပသမဂ္ဂသည် လူအများအပြား ရွှေ့ပြောင်းသွားလာနေထိုင်ရေးဆိုင်ရာ Erasmus အစီအစဉ်ကိုလည်း ထောက်ပံ့သွားရန် ဆန္ဒရှိကြောင်း မိုက်ကယ်က ထပ်လောင်းပြောကြားခဲ့ပါသည်။ နောက်ဆုံးအချက် အနေဖြင့် ဥရောပသမဂ္ဂနှင့် တူရကီနိုင်ငံတို့အကြား ၂၀၁၆ ခုနှစ်တွင်ချုပ်ဆိုခဲ့သည့် ရွှေ့ပြောင်းအခြေချနေထိုင်ခြင်းဆိုင်ရာ သဘောတူညီချက်အရ နေရပ်စွန့်ခွာထွက်ပြေး နေရသည့် ဆီးရီးယားဒုက္ခသည် ၄ သန်းနီးပါးအတွက် တူရကီနိုင်ငံအပေါ် ထောက်ပံ့မှုများ ဆက်လက်လုပ်ဆောင်သွားမည်ဖြစ်ကြောင်း ဥရောပသမဂ္ဂတာဝန်ရှိသူများက ပြောကြား ခဲ့သည်ဟု သိရှိရပါသည်။