တူကီယဲသည် ပင်လယ်နက်အတွင်းမှ သဘာဝဓာတ်ငွေ့များအား စတင်ထုတ်လုပ်သွားမည်ဆိုခြင်း

Xinhua; Jan-30(Mon)

TPAO အမည်ရှိ တူကီယဲနိုင်ငံပိုင်ရေနံကော်ပိုရေးရှင်းသည် ပင်လယ်နက်အတွင်းရှိ Sakarya သဘာဝဓာတ်ငွေ့သိုက်မှ ဓာတ်ငွေ့ထုတ်လုပ်မှုများကို လာမည့်မတ်လ၌ စတင်ပြုလုပ်သွားမည်ဖြစ်ကြောင်းနှင့် ထုတ်လုပ်ရရှိသည့် သဘာဝဓာတ်ငွေ့များအား ပြည်တွင်းဓာတ်အားဖြန့်ဖြူးရေးစနစ်သို့ တင်ပို့သွားမည်ဖြစ်ကြောင်း ယခုလအစောပိုင်းက ထုတ်ပြန်ကြေညာခဲ့သည်ဟု Xinhua သတင်းဌာနက ဇန်နဝါရီလ ၃၀ ရက်တွင် ဖော်ပြခဲ့ ပါသည်။ အဆိုပါတင်ပို့မှုသည် တူကီယဲနိုင်ငံ၏ စွမ်းအင်တင်သွင်းမှုဆိုင်ရာ ကြီးမားသည့် ကုန်ကျစရိတ်များနှင့် ငွေကြေးဖောင်းပွမှုတို့ကို လျှော့ချရာတွင် ကူညီနိုင်မည်ဖြစ်ကြောင်း စွမ်းအင်ရေးရာသုတေသီများက ယုံကြည်ထားလျက်ရှိပါသည်။ Sakarya သဘာဝ ဓာတ်ငွေ့သိုက်သည် လာမည့် ၄ နှစ်အတွင်း စွမ်းအင်ထုတ်လုပ်မှု အမြင့်ဆုံးအခြေအနေသို့ ရောက်ရှိမည်ဖြစ်ကြောင်းနှင့် နိုင်ငံ၏စွမ်းအင်တင်သွင်းမှု ၃၀ ရာခိုင်နှုန်းကို လျော့ကျ နိုင်မည်ဖြစ်ကြောင်း တူကီယဲစွမ်းအင်နှင့်သဘာဝအရင်းအမြစ်ဝန်ကြီး ဖာတီဒန်မက်ဇ် (Fatih Donmez) က ပြောကြားခဲ့ပါသည်။

Sakarya သဘာဝဓာတ်ငွေ့သိုက်သည် တူကီယဲအိမ်ထောင်စုများအား ဓာတ်အား ရရှိရေးအတွက် သဘာဝဓာတ်ငွေ့ နှစ်ပေါင်း ၃၃ နှစ်ကြာ ထောက်ပံ့ပေးနိုင်မည်ဖြစ် ကြောင်း ဝန်ကြီး ဖာတီဒန်မက်ဇ်က ထည့်သွင်းပြောကြားခဲ့ပါသည်။ ထို့ပြင် တူကီယဲ အစိုးရသည် မြေထဲပင်လယ်ဒေသရှိ Akkuyu နျူကလီးယားဓာတ်အားပေးစက်ရုံအား ယခုနှစ်တွင် စတင်လည်ပတ်ရန်စီစဉ်ထားလျက်ရှိပြီး ပင်လယ်နက်ကမ်းခြေနှင့် တူကီယဲ နိုင်ငံ၊ ထရေ့ (Trace) ဒေသတွင်လည်း အနည်းဆုံး နျူကလီးယားဓာတ်အားပေးစက်ရုံကြီး ၂ ခုအား တည်ဆောက်ရန် ကြိုးပမ်းလျက်ရှိကြောင်း တူကီယဲပြည်တွင်း သတင်းဌာန၏ ဖော်ပြချက်များအရ သိရှိရပါသည်။

Ref; Turkish economy to benefit from upcoming production of gas field in Black sea