နှစ်နိုင်ငံဆက်ဆံရေးကောင်းမွန်လာစေရန် ကြိုးပမ်းမှုတစ်ရပ်အဖြစ် တူကီယဲ နိုင်ငံခြားရေးဝန်ကြီး မက်ဗလက်ကာဗူဆိုဂလူ (Mevlut Cavusoglu) သည် ယခု သီတင်းပတ်အတွင်း ဆီးရီးယားနိုင်ငံခြားရေးဝန်ကြီးနှင့်တွေ့ဆုံမည်ဖြစ်ကြောင်း Jpost သတင်းဝဘ်ဆိုက်က မေလ ၈ ရက်တွင် ဖော်ပြခဲ့ပါသည်။ တူကီယဲနိုင်ငံသည် တူကီယဲ-ဆီးရီးယားနယ်စပ်အနီးရှိ ကာ့ဒ်တပ်ဖွဲ့များအား တိုက်ခိုက်နှိမ်နင်းရေးနှင့် ဆီးရီးယားဒုက္ခသည်များ နေရပ်ပြန်ရေးအတွက် ကြိုးပမ်းလုပ်ဆောင်လျက်ရှိပါ သည်။ ဆီးရီးယားဒုက္ခသည် ၄ သန်းနီးပါးအား တူကီယဲနိုင်ငံ၌ လက်ခံထားရခြင်း သည် တူကီယဲသမ္မတ ရီဆက်တေရစ်အာဒိုဂန် (Recep Tayyip Erdogan) အပေါ် မကျေနပ်စရာပြည်တွင်းရေး ဖိအားတစ်ရပ်အဖြစ်ရှိနေသကဲ့သို့ မေလ ၁၄ ရက်တွင် ကျင်းပမည့်ရွေးကောက်ပွဲအတွက်လည်း ပိုမိုခက်ခဲစေမည်ဖြစ်ပါသည်။ တူကီယဲ နိုင်ငံခြားရေးဝန်ကြီးသည် မေလ ၁၀ ရက်တွင် ရုရှားနိုင်ငံ၊ မြို့တော် မော်စကို၌ ဆီးရီးယား၊ ရုရှားနှင့် အီရန်နိုင်ငံခြားရေးဝန်ကြီးတို့ကို တွေ့ဆုံမည်ဖြစ်ကြောင်း မေလ ၃ ရက်တွင် ပြောကြားခဲ့သည်ဟု သိရှိရပါသည်။
No comments:
Post a Comment