Trtworld; Mar-23(Mon)
ဥရောပသမဂ္ဂအနေဖြင့် ဂရိနယ်စပ်ရှိ နိုင်ငံရေးခိုလှုံခွင့်တောင်းခံသူများအပေါ် ပြင်းထန်စွာပြုမူဆက်ဆံလျက်ရှိသည့် ဂရိနိုင်ငံဘက်မှ ဆက်လက်ရပ်တည်နေမည် ဆိုပါက နိုင်ငံတကာဥပဒေနှင့် လူ့အခွင့်အရေးတို့အတွက် ရေရှည်ရပ်တည်သွားနိုင်မည် မဟုတ်ကြောင်း တူရကီနိုင်ငံခြားရေးဝန်ကြီး မက်လက်ကာဗူဆိုဂလူ (Mevlut Cavusoglu) က ပြောကြားခဲ့ပါသည်။ ဆီးရီးယားနိုင်ငံအတွင်း ဖြစ်ပွားလျက်ရှိသောပဋိပက္ခကို ကိုင်တွယ်ဖြေရှင်းသွားရန် ဥရောပသမဂ္ဂအား တူရကီနိုင်ငံက ကာလကြာရှည်စွာ တောင်းဆိုမှုများပြုလုပ်ခဲ့ကြောင်းနှင့် ဥရောပသမဂ္ဂအဖွဲ့ဝင်နိုင်ငံများအတွင်း အစွန်းရောက် ဝါဒ၊ လူမျိုးရေးခွဲခြားဆက်ဆံမှု၊ အစ္စလာမ်ဘာသာအပေါ် ကြောက်ရွံ့မှုနှင့် ဂျူးလူမျိုး များအပေါ် ရန်လိုမှုများမြင့်တက်လျက်ရှိကြောင်း ၎င်းက ဆက်လက်ပြောကြားခဲ့ပါသည်။ ထို့ပြင် ဥရောပသမဂ္ဂနှင့် ဗြိတိန်နိုင်ငံတို့သည် ၂၀၁၆ ခုနှစ်တွင် ရရှိခဲ့သော ဒုက္ခသည်များဆိုင်ရာသဘောတူညီချက်ပါ ကတိကဝတ်များအား လိုက်နာဆောင်ရွက် ခဲ့ခြင်းမရှိကြောင်း ၎င်းက ပြောကြားခဲ့ပါသည်။ တူရကီနိုင်ငံသည် ဥရောပဒေသသို့ ဝင်ရောက်ရန်ကြိုးပမ်းလျက်ရှိသော နိုင်ငံရေးခိုလှုံခွင့်တောင်းခံသူများအတွက် ၎င်း၏ နယ်စပ်ဂိတ်များအား ပြီးခဲ့သည့် ဖေဖော်ဝါရီလအတွင်း ဖွင့်လှစ်ပေးခဲ့ပါသည်။ လက်ရှိ အချိန်တွင် တူရကီ-ဂရိနယ်စပ်၌ ဒုက္ခသည် ၂,၀၀၀ ခန့်သည် ဥရောပဒေသသို့ ဝင်ရောက်၍ နိုင်ငံရေးခိုလှုံခွင့်တောင်းခံရန် ကြိုးပမ်းလျက်ရှိကြောင်း သိရှိရပါသည်။
No comments:
Post a Comment