Economictime ;Mar– 23 (Mon)
တူရကီသင်္ဘောကျင်းကုမ္ပဏီတစ်ခုနှင့် ပူးပေါင်းဆောင်ရွက်ရန် စီစဉ်ထားသည့် ထောက်ပံ့ရေးစစ်ရေယာဉ်တည်ဆောက်ရေးစီမံကိန်းအား ဆက်လက်အကောင်အထည်ဖော် ဆောင်ရွက်သွားမည်ဖြစ်ကြောင်း အိန္ဒိယသင်္ဘောကျင်းကုမ္ပဏီတစ်ခုက ပြောကြားခဲ့ ပါသည်။ အိန္ဒိယနှင့် တူရကီနိုင်ငံတို့ကြား သံတမန်ဆက်ဆံရေး ကတောက်ကဆ ဖြစ်ပွားခဲ့ပြီးနောက် ၎င်း၏ အထက်ပါပြောကြားချက် ထွက်ပေါ်လာခဲ့ခြင်းဖြစ်ပါသည်။ အိန္ဒိယအခြေစိုက် Hindustan သင်္ဘောကျင်းကုမ္ပဏီနှင့် တူရကီအခြေစိုက် Analolu သင်္ဘောကျင်းကုမ္ပဏီတို့သည် အမေရိကန်ဒေါ်လာ ၂.၃ ဘီလီယံတန်ဖိုးရှိ ထောက်ပံ့ရေး စစ်ရေယာဉ်တည်ဆောက်ရေးဆိုင်ရာ သဘောတူညီချက်တစ်ရပ်အား ဖေဖော်ဝါရီလ အတွင်းက လက်မှတ်ရေးထိုးခဲ့ပါသည်။ အဆိုပါလက်မှတ်ရေးထိုးမှုသည် ဂျမူး- ကက်ရှ်မီးယား အရေးနှင့်ပတ်သက်၍ တူရကီနှင့် ပါကစ္စတန်တို့၏ ပူးတွဲကြေညာချက်အား ပြင်းထန်စွာ ကန့်ကွက်ကြောင်း အိန္ဒိယအစိုးရကထုတ်ပြန်ခဲ့ပြီး ရက်အနည်းငယ်အကြာတွင် ဖြစ်ပေါ် ခဲ့ခြင်းဖြစ်ပါသည်။ သဘောတူညီချက်အား အိန္ဒိယကာကွယ်ရေးဝန်ကြီးဌာနနှင့် နိုင်ငံခြားရေး ဝန်ကြီးဌာနတို့ထံမှ ခွင့်ပြုချက်ရရှိပြီးမှသာ လက်မှတ်ရေးထိုးခဲ့ခြင်းဖြစ်ကြောင်း HSL သင်္ဘောကျင်းကုမ္ပဏီက ပြောကြားခဲ့ပါသည်။ သဘောတူစာချုပ်၌ ထည့်သွင်းရမည့် အချက်အလက်များနှင့်ပတ်သက်၍လည်း ကာကွယ်ရေးဝန်ကြီးဌာနမှ ညွှန်ကြားမှုများ ပြုလုပ်ခဲ့ကြောင်း ၎င်းတို့က ပြောကြားခဲ့ပါသည်။ HSL ကုမ္ပဏီသည် အဆိုပါစီမံကိန်း ကို ၂၀၁၆ ခုနှစ်မှ စတင်ခဲ့ခြင်းဖြစ်ပါသည်။ တူရကီသင်္ဘောကျင်းသည် ပါကစ္စတန် ရေတပ်အတွက် စစ်သင်္ဘောများအား အဓိကထားထုတ်လုပ်ပေးလျက်ရှိသည့်အတွက် ယခုကဲ့သို့ အိန္ဒိယနိုင်ငံ၊ HSL သင်္ဘောကျင်းကုမ္ပဏီနှင့် ပူးပေါင်းဆောင်ရွက်ခြင်းအပေါ် လုံခြုံရေးဆိုင်ရာစိုးရိမ်ပူပန်မှုများလည်း မြင့်တက်လျက်ရှိကြောင်း ဒေသတွင်းသတင်း ဌာနတစ်ခုက ဖော်ပြခဲ့ပါသည်။ ထို့ပြင် Hindustan သင်္ဘောကျင်းသည် အိန္ဒိယ၏ နျူကလီးယားလက်နက်တပ်ဆင်သည့် ရေငုပ်သင်္ဘောများ တည်ဆောက်သည့်နေရာ အပြင် အိန္ဒိယအရှေ့ပိုင်းရေတပ်စခန်းဌာနချုပ်နှင့်ပါ အလွန်နီးကပ်လျက်ရှှိကြောင်း သိရှိရပါသည်။
No comments:
Post a Comment