အမေရိကန်နိုင်ငံသည် တူရကီနိုင်ငံအတွက် ထုတ်လုပ်ထားသည့် F-35 တိုက်လေယာဉ်များအား လော့ခ်ဟိမာတင်ကုမ္ပဏီထံမှဝယ်ယူသွားမည်ဆိုခြင်း

Al-monitor; Jul-21 (Tue)

              အမေရိကန်နိုင်ငံသည် တူရကီနိုင်ငံအတွက် ထုတ်လုပ်ထားသည့် F-35 တိုက်လေယာဉ်များအနက်မှ ၈ စီးအား လော့ခ်ဟိမာတင်ကုမ္ပဏီထံမှ ဝယ်ယူသွားမည် ဖြစ်ကြောင်း အမေရိကန်ကာကွယ်ရေးဝန်ကြီးဌာနက ဇူလိုင်လ ၂၀ ရက်တွင် ထုတ်ပြန် ကြေညာခဲ့ပါသည်။ တူရကီနိုင်ငံသည် အဆိုပါတိုက်လေယာဉ်များအား ၂၀၁၈ ခုနှစ်တွင် လက်ခံရရှိသွားရန် မျှော်မှန်းခဲ့သော်လည်း တူရကီသမ္မတ ရီဆက်တေးရစ်အာဒိုဂန် (Recep Tayyip Erdogan) အနေဖြင့် ရုရှားနိုင်ငံထုတ် S-400 လေကြောင်းရန် ကာကွယ်ရေးစနစ်များအား ဝယ်ယူခဲ့သည့်အတွက် အမေရိကန်နိုင်ငံက တူရကီနိုင်ငံကို F-35 တိုက်လေယာဉ်ပူးတွဲထုတ်လုပ်မှုစီမံကိန်းမှ ဖယ်ရှားခဲ့ပါသည်။ အမေရိကန်နိုင်ငံ အနေဖြင့် တူရကီနိုင်ငံသို့ နောက်ထပ်ရောင်းချရန် စီစဉ်ထားသည့် အဆိုပါလေယာဉ် များအား လွှဲပြောင်းပေးသွားမည်မဟုတ်သော်လည်း ရုရှားနိုင်ငံထုတ် S-400 ဝယ်ယူရေး အစီအစဉ်အား စွန့်လွှတ်ခဲ့မည်ဆိုပါက F-35 တိုက်လေယာဉ် ပူးတွဲထုတ်လုပ်မှု စီမံကိန်း၌ ပြန်လည်ပါဝင်ခွင့်ရရှိနိုင်မည်ဖြစ်ကြောင်း အမေရိကန်နိုင်ငံက ပြောကြားခဲ့ ပါသည်။

              ထို့ပြင် တူရကီနိုင်ငံအနေဖြင့် S-400 ဒုံးကျည်စနစ်ဝယ်ယူမှုအား ဆက်လက် လုပ်ဆောင်နေမည်ဆိုပါကလည်း အရေးယူပိတ်ဆို့မှုများ ချမှတ်သွားမည်ဖြစ်ကြောင်း အမေရိကန်နိုင်ငံက ခြိမ်းခြောက်ပြောကြားခဲ့ပါသည်။ အမေရိကန်လွှတ်တော်အမတ် များသည် တူရကီနိုင်ငံသို့ ရောင်းချရန်စီစဉ်ထားသည့် အဆိုပါတိုက်လေယာဉ်များအား ၂၀၂၀ ဘဏ္ဍာရေးနှစ်တွင်ဝယ်ယူသွားရန် စစ်ဘက်အား ခွင့်ပြုပေးခဲ့ခြင်းဖြစ်ပါသည်။ သို့သော်လည်း အမေရိကန်အစိုးရအနေဖြင့် ၂၀၂၂ ခုနှစ်အထိ F-35 တိုက်လေယာဉ် များ၏ အရေးပါသည့်အစိတ်အပိုင်းများအတွက် တူရကီနိုင်ငံ၏ ထုတ်လုပ်မှုအပေါ် ဆက်လက်မှီခိုသွားရမည်ဟု ကာကွယ်ရေးဝန်ကြီးဌာနက ထုတ်ပြန်ခဲ့ကြောင်း သိရှိရ ပါသည်။

သုံးသပ်ချက်

                  တူရကီနိုင်ငံသည် အမေရိကန်နိုင်ငံမှ ဉီးဆောင်ပြုလုပ်လျက်ရှိသည့် အမေရိကန် ဒေါ်လာ ၄၀၀ ဘီလီယံကျော်တန်ဖိုးရှိသော F-35 တိုက်လေယာဉ်များ ပူးတွဲထုတ်လုပ်ရေး စီမံကိန်းတစ်ခုတွင် ၁၉၉၉ ခုနှစ်မှစတင်၍ ပူးပေါင်းပါဝင်ခဲ့ပြီး အဆိုပါတိုက်လေယာဉ် ၁၁၆ စီးအား ဝယ်ယူသွားရန် စီစဉ်ထားရှိပါသည်။ သို့သော် တူရကီနိုင်ငံသည် ၂၀၁၉ ခုနှစ်တွင် ရုရှားနိုင်ငံမှ S-400 လေကြောင်းရန်ကာကွယ်ရေးစနစ်များ ဝယ်ယူခဲ့သည့် အတွက် အမေရိကန်နိုင်ငံကတုံ့ပြန်သည့်အနေဖြင့် F-35 တိုက်လေယာဉ်များ တူရကီ နိုင်ငံသို့ ရောင်းချရေးအစီအစဉ်ကို ရပ်ဆိုင်းခဲ့သည့်အပြင် တူရကီနိုင်ငံရှိ F-35 တိုက်လေယာဉ်များအတွက် လိုအပ်သောလေ့ကျင့်မှုများ ပြုလုပ်ပေးခြင်းကိုလည်း အကန့်အသတ်မရှိ ဆိုင်းငံ့ခဲ့ပါသည်။ နေတိုးအဖွဲ့ဝင်နိုင်ငံတစ်ခုဖြစ်သော တူရကီအနေဖြင့် ရုရှားထံမှ စစ်လက်နက်ပစ္စည်းဝယ်ယူမှုသည် အမေရိကန်အပါအဝင် အခြားနေတိုး အဖွဲ့ဝင်နိုင်ငံများအတွက် မကျေနပ်ချက်တစ်ခု ဖြစ်လာခဲ့ပါသည်။ ထို့ပြင် အမေရိကန် နိုင်ငံသည် ပြီးခဲ့သည့် ဇူလိုင် ၁၇ ရက်က F-35 တိုက်လေယာဉ် ပူးတွဲထုတ်လုပ်မှု စီမံကိန်း၏ တရားဝင်ဝဘ်ဆိုက်မှ တူရကီနိုင်ငံ၏အမည်စာရင်းအား ဖယ်ရှားခဲ့ပါသည်။ သို့သော်လည်း အမေရိကန်အစိုးရအနေဖြင့် ၂၀၂၂ ခုနှစ်ထိ F-35 တိုက်လေယာဉ်များ၏ အရေးပါသည့်အစိတ်အပိုင်းများအတွက် တူရကီနိုင်ငံ၏ ထုတ်လုပ်မှုအပေါ် ဆက်လက် မှီခိုသွားရမည်ဟု ကာကွယ်ရေးဝန်ကြီးဌာနက ထုတ်ပြန်ခဲ့ကြောင်း သိရှိရပါသည်။ အမေရိကန်နိုင်ငံအနေဖြင့် တူရကီနိုင်ငံသို့ နောက်ထပ်ရောင်းချရန်စီစဉ်ထားသည့် အဆိုပါလေယာဉ်များအား လွှဲပြောင်းပေးသွားမည်မဟုတ်သော်လည်း ရုရှားနိုင်ငံထုတ် S-400 ဝယ်ယူရေးအစီအစဉ်အား စွန့်လွှတ်ခဲ့မည်ဆိုပါက F-35 တိုက်လေယာဉ် ပူးတွဲထုတ်လုပ်မှုစီမံကိန်း၌ ပြန်လည်ပါဝင်ခွင့်ရရှိနိုင်မည်ဖြစ်ကြောင်း အမေရိကန် နိုင်ငံက ပြောကြားခဲ့ပါသည်။ သို့ဖြစ်၍ အမေရိကန်နိုင်ငံသည် တူရကီနိုင်ငံအား ရုရှား နိုင်ငံမှ S-400 ဒုံးကျည်စနစ်များဝယ်ယူမှုစွန့်လွှတ်နိုင်ရေးအတွက် ယခုကဲ့သို့ပြင်းထန် သည့် ဖိအားပေးလုပ်ဆောင်ချက်များကြောင့် အမေရိကန်-တူရကီ ဆက်ဆံရေးမှာ ဆိုးရွားလာနိုင်ကြောင်း သုံးသပ်တင်ပြအပ်ပါသည်။

F-35 တိုက်လေယာဉ်ပုံ

F-35 တိုက်လေယာဉ်၏ အချက်အလက်များ

၁။      လေသူရဲ                     -   ၁ ဦး ။

၂။      အလျား                      -   ၅၀ ပေ ၆ လက်မ ။

၃။      တောင်ပံအလျား        -   ၃၅ ပေ ။

၄။      အမြင့်                        -   ၁၇ ပေ ၄ လက်မ ။

၅။      အလေးချိန်                 -   ၄၄,၄ဝဝ ပေါင် ။

၆။      အင်ဂျင်                      -   ၁ လုံး ။

၇။      အမြန်နှုန်း                  -   ၁.၆ မက် ။

၈။      တာဝေးပျံသန်းနိုင်မှု    -   ၂,၂ဝဝ ကီလိုမီတာ ။

၉။      စစ်ဆင်နိုင်မှု               -   ၁,၁၁ဝ ကီလိုမီတာ ။