ရိုမေးနီးယားသမ္မတသည် ဝန်ကြီးချုပ်သစ်အား အဆိုပြုခန့်အပ်ခဲ့ခြင်း

Dailymail; Oct-11 (Mon)

ရိုမေးနီးယားနိုင်ငံတွင် ပြီးခဲ့သည့်သီတင်းပတ်အတွင်း၌ လစ်ဘရယ်ညွန့်ပေါင်း အစိုးရအဖွဲ့အား အယုံအကြည်မရှိဆန္ဒမဲများဖြင့် ဖြုတ်ချခဲ့ပြီးနောက်တွင် ဗဟိုပါတီ (Centrist Party) ခေါင်းဆောင်ဖြစ်သူ ဒေရှန်ချာလို့စ် (Dacian Ciolos) အား ဝန်ကြီးချုပ် အဖြစ် ရိုမေးနီးယားသမ္မတ ကလော့စ်လိုဟန်နစ် (Klaus Iohannis)က အောက်တိုဘာလ ၁၁ ရက်တွင် အဆိုပြုခန့်အပ်ခဲ့ပါသည်။ ထို့ပြင် သမ္မတ လိုဟန်နစ်သည် အစိုးရအဖွဲ့ ဖွဲ့စည်းရန်အတွက် ချာလို့စ်အား တာဝန်အပ်နှင်းခဲ့ကြောင်းကိုလည်း ကြေညာခဲ့ပါသည်။ ချာလို့စ်သည် ၂၀၁၅ ခုနှစ်မှ ၂၀၁၇ ခုနှစ်အတွင်း အိမ်စောင့်အစိုးရအဖွဲ့တွင် ဝန်ကြီးချုပ် အဖြစ် တာဝန်ထမ်းဆောင်ခဲ့သူတစ်ဦးလည်းဖြစ်ပါသည်။ ၎င်းအနေဖြင့် တာဝန်ပေးအပ် ချိန်မှစတင်၍ အစိုးရအဖွဲ့၏တာဝန်များအား ထမ်းဆောင်သွားရန်နှင့် အခြားပါတီများနှင့် ညှိနှိုင်းဆွေးနွေးမှုများ စတင်လုပ်ဆောင်သွားရန် အသင့်ရှိနေပြီဖြစ်ကြောင်း ချာလို့စ်က ပြောကြားခဲ့ပါသည်။ ရိုမေးနီးယားနိုင်ငံအနေဖြင့် အကျပ်အတည်းများမှကျော်လွှားနိုင်ရန် လိုအပ်ပြီး ၎င်းရည်မှန်းချက်အတွက် နိုင်ငံရေးပါတီအားလုံးတွင် တာဝန်ရှိကြောင်း ၎င်းက ပြောကြားခဲ့ပါသည်။

ရိုမေးနီးယားနိုင်ငံ၏ နိုင်ငံရေးအကျပ်အတည်းသည် စက်တင်ဘာလအစောပိုင်း အတွင်း ဝန်ကြီးချုပ်ဟောင်း ဖလိုရင်စီတူ (Florin Citu)က (Union to Save Romani-USR Plus) ပါတီဝင်ဖြစ်သည့် တရားရေးဝန်ကြီးအား အမေရိကန်ဒေါ်လာ ၁၁.၅ ဘီလီယံ တန်ဖိုးရှိ ဒေသတွင်း အခြေခံအဆောက်အအုံဖွံ့ဖြိုးရေးအစီအစဉ်ကို လက်မှတ်ရေးထိုးခြင်း မရှိမှုနှင့်ပတ်သက်၍ ရာထူးမှ ထုတ်ပယ်ခဲ့ရာမှ စတင်ဖြစ်ပေါ်ခဲ့ခြင်းဖြစ်ပါသည်။ USR-Plus ပါတီသည် ၎င်းလုပ်ရပ်အား တုံ့ပြန်သည့်အနေဖြင့် ၎င်းတို့ပါတီဝင် ဝန်ကြီး ၆ ဦးအား ရာထူးမှ နုတ်ထွက်စေခဲ့ပါသည်။ ပြီးခဲ့သည့်သီတင်းပတ်၌ USR – Plus ပါတီနှင့် AUR ပါတီတို့၏ထောက်ခံမှုနှင့်အတူ အတိုက်အခံ Social Democrat Party က တင်သွင်း ခဲ့သော အစိုးရအဖွဲ့အား အယုံအကြည်မရှိအဆိုကို လွှတ်တော်၌ မဲခွဲဆုံးဖြတ်ခဲ့ရာ မဲအပြတ်အသတ်ဖြင့် အတည်ပြုနိုင်ခဲ့ခြင်းဖြစ်ပါသည်။ သမ္မတမှအဆိုပြုခန့်အပ်သော ဝန်ကြီးချုပ်အနေဖြင့် လွှတ်တော်၏ထောက်ခံအတည်ပြုမှု လိုအပ်မည်ဖြစ်ကြောင်း သိရှိရပါသည်။