ဆွီဒင်နိုင်ငံသည်ဥရောပသမဂ္ဂကောင်စီ၏ အလှည့်ကျ ဥက္ကဋ္ဌတာဝန်ကိုလွှဲပြောင်းရယူသွားမည်ဆိုခြင်း

ဆွီဒင်နိုင်ငံသည် ချက်သမ္မတနိုင်ငံထံမှ ဥရောပသမဂ္ဂကောင်စီ၏ အလှည့်ကျ ဥက္ကဋ္ဌတာဝန်ကို ဇန်နဝါရီလ ၁ ရက်တွင် လွှဲပြောင်းရယူသွားမည်ဖြစ်ကြောင်း Anadolu Agency သတင်းဌာနက ဇန်နဝါရီလ ၁ ရက်တွင် ရေးသားဖော်ပြခဲ့ပါသည်။ ဆွီဒင်နိုင်ငံ သည် အလှည့်ကျဥက္ကဋ္ဌအဖြစ် ဇူလိုင်လ ၁ ရက်အထိ တာဝန်ယူဆောင်ရွက်သွားမည်ဖြစ်ပြီး လုံခြုံရေး၊ ယှဉ်ပြိုင်နိုင်စွမ်း၊ သဘာဝပတ်ဝန်းကျင်နှင့် စွမ်းအင်အသွင်ကူးပြောင်းမှု၊ ဒီမိုကရေစီစံနှုန်းများနှင့် တရားဥပဒေစိုးမိုးရေးတို့အား ဦးစားပေးဆောင်ရွက်သွားမည် ဖြစ်ကြောင်း ဆွီဒင်အစိုးရက ထုတ်ပြန်ခဲ့ပါသည်။ ထို့ပြင် ဆွီဒင်နိုင်ငံအနေဖြင့် ယူကရိန်း နိုင်ငံအပေါ် စစ်ရေးနှင့် စီးပွားရေးဆိုင်ရာကူညီထောက်ပံ့မှုများ ဆက်လက်ပေးအပ်သွားရန် ဦးစားပေးဆောင်ရွက်ခြင်း၊ ယူကရိန်းနိုင်ငံ၏ အီးယူဝင်ခွင့်လုပ်ငန်းစဉ်များကိုလည်း ကူညီ ပေးခြင်းနှင့် ယူကရိန်းနိုင်ငံပြန်လည်တည်ဆောက်ရေးဆိုင်ရာ ဆောင်ရွက်ခြင်းများကိုလည်း လုပ်ဆောင်သွားမည်ဖြစ်ကြောင်း သတင်းဌာန၏ ရေးသားဖော်ပြချက်အရ သိရှိရပါသည်။