ကုလသမဂ္ဂ၊ တူရကီ၊ ကာတာနှင့် အမေရိကန်တို့မှ ကိုယ်စားလှယ်များသည် တူရကီနိုင်ငံ၌ကျင်းပမည့် အာဖဂန်ငြိမ်းချမ်းရေးညီလာခံမတိုင်မီ ဆွေးနွေးမှုများပြုလုပ်ရန် အာဖဂန်နစ္စတန်အစိုးရ၏ ငြိမ်းချမ်းရေးစေ့စပ်ညှိနှိုင်းမှုကိုယ်စားလှယ်အဖွဲ့နှင့် ကာတာ နိုင်ငံ၌ တွေ့ဆုံခဲ့ကြောင်း အာဖဂန်အစိုးရ၏ စေ့စပ်ညှိနှိုင်းရေးအဖွဲ့ဝင် ဂူလမ်ဖာရုမဂျ်ရော့ (Ghulam Farooq Majroh) က ဧပြီလ ၃ ရက်တွင် ပြောကြားခဲ့ပါသည်။ အာဖဂန်ငြိမ်းချမ်းရေး ဆိုင်ရာ အမေရိကန်အထူးကိုယ်စားလှယ် ဇယ်လ်မေးခါလီဇက် (Zalmay Khalilzad) သည် ကာတာရှိ တာလီဘန်ခေါင်းဆောင် မူလ်လာဘာရာဒါ (Mullah Baradar) အပါအဝင် တာလီဘန်အဖွဲ့၏ အခြားထိပ်တန်းခေါင်းဆောင်များနှင့် မတ်လ ၃၀ ရက်တွင်တွေ့ဆုံ၍ အာဖဂန်မှ အမေရိကန်တပ်ဖွဲ့ဝင်များရုပ်သိမ်းရေးအပါအဝင် ယခင်ရရှိထားသည့် အမေရိကန်-တာလီဘန် ငြိမ်းချမ်းရေးသဘောတူညီချက်ဆိုင်ရာကိစ္စရပ်များနှင့်ပတ်သက်၍ ဆွေးနွေးခဲ့ပါသည်။ တူရကီ၌ လာမည့်သီတင်းပတ်အနည်းငယ်အတွင်း ကျင်းပမည့် အာဖဂန်ငြိမ်းချမ်းရေးညီလာခံသည် အာဖဂန်ငြိမ်းချမ်းရေးလုပ်ငန်းစဉ်အတွက် ကောင်းမွန် သည့် အထောက်အပံ့ကောင်းတစ်ခုအားရရှိလိမ့်မည်ဟု အာဖဂန်နိုင်ငံရေးသမားများက ယုံကြည်လျက်ရှိကြောင်း သိရှိရပါသည်။
No comments:
Post a Comment