တူရကီသည် ဆီးရီးယားအရေးနှင့်ပတ်သက်၍ ရုရှားနှင့်ပြုလုပ်ထားသော အပစ်အခတ် ရပ်စဲရေးသဘောတူညီချက်အားဖောက်ဖျက်ကာ တိုက်ခိုက်မှုများပြုလုပ်လျက်ရှိခြင်း

Bulgarianmilitary.com; May-31(Sun)

             တူရကီနိုင်ငံသည် ဆီးရီးယားအရေးနှင့်စပ်လျဉ်း၍ ရုရှားနှင့်ပြုလုပ်ထားသော စစ်မက်ဖြစ်ပွားမှုလျှော့ချရေးဇုန်တည်ဆောက်ရေးသဘောတူညီချက်အား ဖောက်ဖျက်၍ အလက်ပို (Aleppo) နှင့် အိုင်ဒဲလစ် (Idlib) ဒေသများရှိ ဆီးရီးယားအစိုးရတပ်ဖွဲ့ဝင် များအပေါ် တိုက်ခိုက်မှုများလုပ်ဆောင်လျက်ရှိသည်ဟု Bulgarian Military စစ်ရေး သတင်းဌာနက မေလ ၃၁ ရက်တွင်ဖော်ပြခဲ့ပါသည်။ အဆိုပါသတင်းဌာန၏ ဖော်ပြချက် အရ တူရကီသည် ၎င်းတို့၏အမြောက်များအား မကြာသေးမီအတွင်းက ဆီးရီးယား နယ်မြေအတွင်းသို့ ရွှေ့ပြောင်းထားခဲ့ပြီး မေလ ၃၀ ရက်တွင် တိုက်ခိုက်မှုများ စတင် လုပ်ဆောင်ခဲ့ခြင်းဖြစ်ပါသည်။ အဆိုပါသတင်းဌာန၏ဖော်ပြချက်အရ တူရကီအနေဖြင့် အလက်ပိုအနောက်ဘက်ရှိ ဆီးရီးယားတပ်ဖွဲ့နေရာများအား အကြောင်းမဲ့ပစ်ခတ် တိုက်ခိုက်ခဲ့ခြင်းဖြစ်ပြီး အဆိုပါတိုက်ခိုက်မှုကြောင့် ဆီးရီးယားတပ်ဖွဲ့ဝင် ၁၀ ဦးခန့် သေဆုံးခဲ့သည်ဟု ဖော်ပြထားပါသည်။

          တစ်ချိန်တည်းမှာပင် အလက်ပိုမြို့၏တောင်ဘက် ဂျာဘယ်အယ်လ်ဇာဝီယာ (Jabal al-Zawiya) ဒေသတွင်လည်း ဆီးရီးယားအစိုးရတပ်ဖွဲ့နှင့် တူရကီကျောထောက် နောက်ခံပြု အကြမ်းဖက်အဖွဲ့များအကြား တိုက်ခိုက်မှုများဖြစ်ပွားခဲ့ပါသည်။ အဆိုပါ တိုက်ခိုက်မှုများနှင့်ပတ်သက်၍ ရုရှားတို့အနေဖြင့် တစ်စုံတစ်ရာထုတ်ဖော်ပြောကြား ခဲ့ခြင်းမရှိကြောင်း ၎င်းသတင်းဌာနကဖော်ပြခဲ့ပါသည်။ တူရကီအနေဖြင့် ၂၀၂၀ ပြည့်နှစ် အစောပိုင်းမှစတင်ကာ ဆီးရီးယားနိုင်ငံအတွင်း ဝင်ရောက်တိုက်ခိုက်လျက်ရှိခြင်းဖြစ်ပြီး ဖေဖော်ဝါရီလအတွင်း တူရကီနှင့် ဆီးရီးယားအစိုးတပ်ဖွဲ့များအကြား ဖြစ်ပွားခဲ့သော တိုက်ပွဲများအတွင်း တူရကီဘက်မှ တပ်ဖွဲ့ဝင် ၆၂ ဦးထက် မနည်းသေဆုံး၍ တပ်ဖွဲ့ဝင် ၁၀၀ ကျော်ဒဏ်ရာရရှိခဲ့ပါသည်။ ထို့နောက် ဆီးရီးယားနိုင်ငံအတွင်းဖြစ်ပွားလျက်ရှိသော ပဋိပက္ခများအဆုံးသတ်နိုင်ရေးအတွက် တူရကီသမ္မတ ရီဆတ်တေရစ်အာဒိုဂန်  (Recep Tayyip Erdogan) နှင့် ရုရှားသမ္မတ ဗလာဒီမာပူတင် (Vladimir Putin) တို့သည် မတ်လ အတွင်း၌ အပစ်အခတ်ရပ်စဲရေးသဘောတူညီမှုတစ်ရပ်ပြုလုပ်ခဲ့ကြောင်း သိရှိရပါသည်။

သုံးသပ်ချက်

             တူရကီသမ္မတ ရီဆတ်တေးရစ်အာဒိုဂန်  (Recep Tayyip Erdogan) နှင့် ရုရှားသမ္မတ ဗလာဒီမာပူတင် (Vladimir Putin) တို့သည် မတ်လ ၅ ရက်တွင် ဆီးရီးယား ပဋိပက္ခအား အဆုံးသတ်နိုင်ရေးအတွက် အိုင်ဒဲလစ်ဒေသအတွင်း အပစ်အခတ်ရပ်စဲ ထားရန် သဘောတူညီမှုရရှိခဲ့ပြီး ၎င်းဒေသအပါအဝင် အဓိကအဝေးပြေးလမ်းမကြီး ဖြစ်သည့် M-4 အဝေးပြေးလမ်းတစ်လျှောက်တွင်လည်း မေလ ၂၈ ရက်အထိ ရုရှား- တူရကီပူးတွဲကင်းလှည့်မှု (၁၃) ကြိမ်အထိ လုပ်ဆောင်ခဲ့ပါသည်။ ထို့သို့သဘောတူညီမှု နှင့်ပူးတွဲကင်းလှည့်မှုများဆောင်ရွက်ခဲ့သော်လည်း ဆီးရီးယားအစိုးရတပ်ဖွဲ့နှင့် တူရကီ တို့အကြားတိုက်ခိုက်မှုများသည် ဆက်လက်ဖြစ်ပေါ်နေဆဲဖြစ်ပါသည်။ ဆီးရီးယားသမ္မတ ဘာရှာအာဆတ် (Bashar al-Assad) က တူရကီတပ်ဖွဲ့များအား နိုင်ငံအတွင်းမှ ထွက်ခွာသွားရန် တောင်းဆိုထားသော်လည်း တူရကီတို့အနေဖြင့် ဆီးရီးယားနယ်မြေ အတွင်း၌ပင် ဆက်လက်တပ်စွဲထားဆဲဖြစ်ပါသည်။ ၎င်းတိုက်ပွဲများနှင့်ပတ်သက်၍ တိုက်ခိုက်မှုများတွင် ဆီးရီးယားအစိုးရဘက်မှ ရုရှားတပ်ဖွဲ့များ ပါဝင်ကူညီနေသည်ဟု အမေရိကန်က စွပ်စွဲပြစ်တင်ထားပြီး တူရကီနှင့်ရုရှားတို့အကြား တင်းမာမှုပိုမို ပြင်းထန်လာစေရန် လှုံ့ဆော်မှုများပြုလုပ်ခဲ့သည်ကိုတွေ့ရှိရပါသည်။ တစ်ဖက်တွင် တူရကီကလည်း ရုရှားနှင့်သဘောတူညီမှုပြုလုပ်ပြီးနောက်ပိုင်း ၎င်း၏တပ်ဖွဲ့ဝင်များဖြင့် တိုက်ရိုက်ထိတွေ့တိုက်ခိုက်ခြင်းထက် အိုင်ဒဲလစ်ဒေသရှိ အကြမ်းဖက်အဖွဲ့များအပေါ် နောက်ကွယ်မှထောက်ပံ့ပေးခြင်း၊ လေကြောင်းပစ်ကူပေးခြင်း၊ အမြောက်များဖြင့် ပစ်ခတ်ခြင်းတို့အား လုပ်ဆောင်လာခဲ့သည်ကိုတွေ့ရှိရပါသည်။ မကြာသေးမီအတွင်း ကလည်း တူရကီတို့သည် ၎င်းတို့၏အမြောက်များအား ဆီးရီးယားနယ်မြေအတွင်းသို့ ရွှေ့ပြောင်းထားခဲ့ပြီး မေလ ၃၀ ရက်မှစတင်ကာ ပစ်ခတ်တိုက်ခိုက်မှုများလုပ်ဆောင်ခဲ့ သောကြောင့် ဆီးရီးယားအစိုးရတပ်ဖွဲ့ဝင် ၁၀ ဦးခန့် သေဆုံးခဲ့ပါသည်။ ထို့ကြောင့် ဆီးရီးယားပဋိပက္ခအဆုံးသတ်နိုင်ရေးသည် ဆက်လက်ဝေးကွာနေဆဲဖြစ်ပြီး တူရကီနှင့် ရုရှားတို့အကြားရရှိထားသည့် သဘောတူညီချက်သည် အပြန်အလှန်တိုက်ခိုက်မှုများ မြင့်တက်လာသည်နှင့်အမျှ ပျက်ပြယ်လာနိုင်ဖွယ်ရှိကြောင်း သုံးသပ်တင်ပြအပ်ပါသည်။

News Bar

              လစ်ဗျားနိုင်ငံနှင့် ဂရိနိုင်ငံ၊ ခရီတီ (Crete) ကျွန်းတို့အကြားရှိ နိုင်ငံတကာ ရေပိုင်နက်တွင် တူရကီရေတပ်မှ ဖရီးဂိတ်စစ်သင်္ဘော ၆ စီးနှင့် ရေနံတင်သင်္ဘော ၁ စီး တို့အား တွေ့ရှိခဲ့ကြောင်း ဂရိနိုင်ငံပိုင် ကာသီမာရီနီ (Kathimerini) သတင်းစာက မေလ ၃၁ ရက်တွင် ဖော်ပြခဲ့ပါသည်။ အဆိုပါ တူရကီစစ်သင်္ဘောများသည် လက်ရှိအချိန်တွင် လစ်ဗျားကမ်းရိုးတန်း၌ ပြုလုပ်လျက်ရှိသော ဥရောပသမဂ္ဂ၏ Operation Irini တွင် ပါဝင်ဆောင်ရွက်လျက်ရှိသည့် စစ်သင်္ဘောများ၏အရေအတွက်ထက် ပိုမိုကြောင်း အဆိုပါ သတင်းစာက ဖော်ပြထားပါသည်။ တူရကီနိုင်ငံသည် ထရီပိုလီမြို့အခြေစိုက် လစ်ဗျား အမျိုးသားအစိုးရသဘောတူညီချက်အဖွဲ့(Government of National Accord-GNA) အား စစ်ဘက်ဆိုင်ရာအကူအညီများ ပေးအပ်လျက်ရှိသည့် နိုင်ငံတစ်နိုင်ငံဖြစ်ကြောင်း သိရှိရပါသည်။

မြောက်မက်ဆီဒိုးနီးယားသည် နိုင်ငံတော်အရေးပေါ်အခြေအနေကို ဇွန်လ ၁၃ ရက်အထိ သက်တမ်းတိုးမြှင့်ခဲ့ခြင်း

Xinhua; May-31 (Sun)

              မြောက်မက်ဆီဒိုးနီးယားနိုင်ငံအတွင်း COVID-19 ကူးစက်ရောဂါဖြစ်ပွားသူ ဦးရေမြင့်တက်ခဲ့သဖြင့် အရေးပေါ်အခြေအနေကို ဇွန် ၁၃ ရက်အထိ နောက်ထပ် ၁၄ ရက် သက်တမ်းတိုးမြှင့်ခဲ့ကြောင်း သမ္မတ စတီဗိုပန်ဒါရိုစကီ (Stevo Pendarovski) က မေလ ၃၀ ရက်တွင် ကျင်းပပြုလုပ်သည့် လုံခြုံရေးကောင်စီအစည်းအဝေးအပြီးတွင် ကြေညာခဲ့ပါသည်။ အစိုးရနှင့် အဖွဲ့အစည်းများအနေဖြင့် COVID-19 ကူးစက်ရောဂါ ဖြစ်ပွားမှုကြောင့် ပြည်သူများ၏ကျန်းမာရေးနှင့် လူမှုစီးပွားအပေါ် ဆိုးကျိုးသက်ရောက် မှုများအား ထိရောက်သော စီမံခန့်ခွဲမှုပြုလုပ်နိုင်ရန်အတွက် သမ္မတ စတီဗိုပန်ဒါရိုစကီက အထက်ပါအတိုင်း ကြေညာချက်ထုတ်ပြန်ခဲ့ရခြင်းဖြစ်ပါသည်။ ပြည်သူများအနေဖြင့် COVID-19 ကူးစက်ရောဂါနှင့်ပတ်သက်သော ကြိုတင်ကာကွယ်ရေးနည်းလမ်းများအား လိုက်နာခဲ့သည့်အပေါ် သမ္မတ စတီဗိုပန်ဒါရိုစကီက ချီးကျူးပြောကြားခဲ့ပါသည်။

          ဒေသအချို့တွင် COVID-19 ဖြစ်ပွားမှုမရှိခြင်းကြောင့် တစ်နိုင်ငံလုံး အတိုင်းအတာဖြင့် သွားလာမှုကန့်သတ်ချက်များကို မလုပ်ဆောင်သင့်ကြောင်း သမ္မတ စတီဗိုပန်ဒါရိုစကီက အစိုးရအဖွဲ့အား အကြံပြုပြောကြားခဲ့ပါသည်။ သမ္မတ စတီဗိုပန်ဒါရိုစကီသည် နိုင်ငံအတွင်း COVID-19 ကူးစက်ရောဂါပျံ့နှံ့မှုကို ထိန်းချုပ်ရန် အတွက် ရက်ပေါင်း ၃၀ ကြာ အရေးပေါ်အခြေအနေကြေညာခြင်းကို မတ်လ ၁၈ ရက် နှင့် ဧပြီ ၁၆ ရက်တို့ တွင် ၂ ကြိမ်ဆက်တိုက် ပြုလုပ်ခဲ့ပါသည်။ ကျန်းမာရေးဝန်ကြီး ဌာန၏ထုတ်ပြန်ချက်အရ မေလ ၃၀ ရက်တွင် ရောဂါကူးစက်ခံရသူ ၃၅ ဦး ထပ်မံ တွေ့ရှိရသဖြင့် နိုင်ငံအတွင်း စုစုပေါင်းရောဂါဖြစ်ပွားသူ ၂,၁၆၄ ဦး၊ ပြန်လည် ကောင်းမွန်လာသူ ၁,၅၃၅ ဦးနှင့် သေဆုံးသူ ၁၃၁ ဦးရှိကြောင်း သိရှိရပါသည်။ 

လတ်ဗီးယားအစိုးရသည် အလုပ်လက်မဲ့များအား မွမ်းမံသင်တန်းများပေး၍ လစာများ ထောက်ပံ့ပေးနိုင်ရန် ပြင်ဆင်လျက်ရှိခြင်း

Xinhua; May-29( Fri)

              လတ်ဗီးယားအစိုးရသည် ကိုရိုနာဗိုင်းရပ်စ် (COVID-19) ကပ်ရောဂါ ကူးစက်ပျံ့နှံ့မှု များအား ထိန်းချုပ်နိုင်ရန်အတွက် ချမှတ်ခဲ့သော  နိုင်ငံ့၏အရေးပေါ်အခြေအနေတစ်ရပ်အား ရုပ်သိမ်းရန် ပြင်ဆင်လျက်ရှိကြောင်း ဆင်ဟွာသတင်းဌာနက မေလ ၂၉ ရက်တွင် ဖော်ပြခဲ့ပါသည်။ လတ်ဗီးယားအစိုးရအနေဖြင့် နိုင်ငံအတွင်း COVID-19 ဖြစ်ပွားမှု ကြောင့် ထိခိုက်ဆုံးရှုံးခဲ့ရသော လူပုဂ္ဂိုလ်တစ်ဦးချင်းစီတိုင်းနှင့် စီးပွားရေးလုပ်ငန်းများ ကို ထောက်ပံ့ပေးနိုင်ရန် စီမံချက်အသစ်များရေးဆွဲထားကြောင်း အဆိုပါသတင်းဌာနက ဖော်ပြခဲ့ပါသည်။ လတ်ဗီးယားနိုင်ငံ၏ အရေးပေါ်အခြေအနေသည် ဇွန်လ ၃၀ ရက်၌  သက်တမ်းကုန်ဆုံးတော့မည်ဖြစ်သည့်အတွက် အစိုးရအနေဖြင့် COVID-19 ကြောင့် အလုပ်လက်မဲ့ဘဝသို့ ရောက်ရှိခဲ့ရသူများအတွက် အလုပ်အကိုင်သစ်များ ဖန်တီးပေးရေး အစီအစဉ်များအပါအဝင် အချို့သောပုဂ္ဂလိက စီးပွားရေးလုပ်ငန်းများအတွက် အလုပ်အကိုင် များပေးအပ်နိုင်ရန် စီစဉ်ထားကြောင်း မေလ ၂၈ ရက်တွင် ကျင်းပပြုလုပ်ခဲ့သော သတင်းစာရှင်းလင်းပွဲအတွင်း ဘဏ္ဍာရေးဝန်ကြီး ဂျာနစ်ရီရာ (Janis Reirs) က ပြောကြား ခဲ့ပါသည်။

              လတ်ဗီးယားဘဏ္ဍာရေးဝန်ကြီးဌာနသည် COVID-19 ကပ်ရောဂါ ကူးစက်မှု ဒဏ်ကြောင့် ထိခိုက်ဆုံးရှုံးခဲ့ရသော လူပုဂ္ဂိုလ်တစ်ဦးချင်းစီတိုင်းနှင့် စီးပွားရေးလုပ်ငန်း များကို ၂၀၂၀ ပြည့်နှစ်ကုန်အထိ ဆက်လက်ထောက်ပံ့ပေးအပ်နိုင်မည့် ဥပဒေမူကြမ်း တစ်ရပ်ကိုရေးဆွဲခဲ့ပါသည်။ အစိုးရအနေဖြင့် ကိုရိုနာဗိုင်းရပ်စ်ကြောင့် လုပ်ငန်းလည်ပတ်မှု များရပ်ဆိုင်းရန် တွန်းအားပေးခံခဲ့ရသည့်ကုမ္ပဏီများတွင် လုပ်ကိုင်ဆောင်ရွက်နေရ သည့် အလုပ်သမားများအား အထူးထောက်ပံ့ကြေးငွေများပေးအပ်လျက်ရှိကြောင်း ဂျာနစ်ရီရာက ပြောကြားခဲ့ပါသည်။ အစိုးရအနေဖြင့် အလုပ်လက်မဲ့များကို ထောက်ပံ့ ငွေများပေးအပ်မည့်အစား လုပ်ခလစာပိုမိုရရှိနိုင်မည့် စီမံကိန်းများတွင် ဝင်ရောက် လုပ်ကိုင်နိုင်ရေး သင်ကြားမှုများပြုလုပ်ပေးသွားမည်ဖြစ်ကြောင်း ဂျာနစ်ရီရာက ပြောကြားခဲ့သည်ဟု သိရှိရပါသည်။

News Bar

              တူရကီသမ္မတ ရီဆက်တေရစ်အာဒိုဂန် (Recep Tayyip Erdogen) က အနောက်ဘက်ကမ်းဒေသအား ကျူးကျော်သိမ်းပိုက်မည့် အစ္စရေးအစိုးရသစ်၏အစီအမံ များအပေါ် ခြိမ်းခြောက်ပြောဆိုခဲ့ကြောင်း အစ္စရေးတိုင်းစ် (Times of Israel) သတင်း ဌာနက ဖော်ပြခဲ့ပါသည်။ မိမိတို့အနေဖြင့် ပါလက်စတိုင်းတို့၏ အချုပ်အခြာအာဏာနှင့် နယ်မြေပိုင်ဆိုင်မှုတို့အပေါ် ခြိမ်းခြောက်အန္တရာယ်ပေးလာမည့်  အစ္စရေးအစိုးရ၏အစီအမံ များကို မြင်တွေ့နေရကြောင်းနှင့် ၎င်းတို့၏ကျူးကျော်သိမ်းပိုက်ရေးစီစဉ်နေမှုများသည် နိုင်ငံတကာဉပဒေများနှင့်ကိုက်ညီမှုမရှိကြောင်းကိုလည်း တူရကီသမ္မတ အာဒိုဂန်က မွတ်စလင်ဘာသာရေးပွဲတော် (Eid al-Fier) ကာလအတွင်း ရုပ်/သံအစီအစဉ်မှတစ်ဆင့် ထုတ်လွှင့်ခဲ့သည့်မိန့်ခွန်းတွင် ထည့်သွင်းပြောဆိုခဲ့ကြောင်း သိရှိရပါသည်။

ကိုဆိုဗိုသမ္မတသည် ဆားဘီးယားနှင့်ဆက်ဆံရေးပြန်လည်ကောင်းမွန်စေရေး ဆွေးနွေးပွဲအား ငြင်းဆိုခဲ့ခြင်း

Reuters; May-26 (Tue)

              ဆားဘီးယားနှင့် ကိုဆိုဗိုဆက်ဆံရေး ပုံမှန်ပြန်ဖြစ်စေရေးအတွက် ဥရောပသမဂ္ဂ အထူးဖျန်ဖြေရေးအဖွဲ့ဦးဆောင်သော ဆွေးနွေးပွဲတွင် ပါဝင်ဆွေးနွေးမှုပြုလုပ်သွားမည် မဟုတ်ကြောင်း ကိုဆိုဗိုသမ္မတ ဟာရှင်သာစီ (Hashim Thaci) က မေလ ၂၆ ရက်တွင် ပြောကြားခဲ့ပါသည်။ ထို့ပြင် ၎င်းတို့နှစ်ဖက်အဖွဲ့အကြား တွေ့ဆုံဆွေးနွေးမှုများအတွင်း အမေရိကန်၏အခန်းကဏ္ဍ ပိုမိုတိုးမြှင့်သွားရန်အတွက်လည်း ကိုဆိုဗိုက တောင်းဆိုခဲ့ ပါသည်။ ကိုဆိုဗိုသည် ၂၀၀၈ ခုနှစ်တွင် ဆားဘီးယားနိုင်ငံမှ ခွဲထွက်၍ လွတ်လပ်ရေးကို ကြေညာခဲ့ပြီး ခွဲထွက်ရေးဆိုင်ရာ အရေးပါသည့်ကိစ္စရပ်များအား ဖြေရှင်းရန်အတွက် ဥရောပသမဂ္ဂဦးဆောင်သည့် ဆွေးနွေးမှုများတွင်ပါဝင်သွားရန် ၂၀၁၃ ခုနှစ်တွင် ဆားဘီးယား နှင့်အတူ သဘောတူညီခဲ့ကြပါသည်။ ဥရောပသမဂ္ဂနိုင်ငံခြားရေးမူဝါဒအကြီးအကဲနှင့် စပိန်နိုင်ငံခြားရေးဝန်ကြီးဟောင်းဖြစ်သူ ဂျိုးဇက်ဘော်ရယ်လ် (Josep Borrell) သည် ကိုဆိုဗိုအရေးကိစ္စ၏ အထူးဖျန်ဖြေသူအဖြစ် ဆလိုဗက်ကီးယားသံတမန်ဖြစ်သူ မီရိုဆလပ်ဗ် လာဂျက်ခ် (Miroslav Lajcak) အား မတ်လတွင် ခန့်အပ်ခဲ့ခြင်းဖြစ်ကြောင်း ရိုက်တာ သတင်းဌာနက ဖော်ပြခဲ့ပါသည်။

              ကိုဆိုဗို၏ လွတ်လပ်ရေးနှင့်ပတ်သက်၍ ဥရောပသမဂ္ဂအဖွဲ့ဝင်နိုင်ငံများဖြစ်သည့် ဆလိုဗက်ကီးယားအပါအဝင် ဆိုက်ပရပ်စ်၊ ဂရိ၊ ရိုမေးနီးယားနှင့် စပိန်နိုင်ငံတို့က အသိအမှတ်ပြုရန်ငြင်းဆန်လျက်ရှိပါသည်။ ထိုသို့ ကိုဆိုဗိုလွတ်လပ်ရေးအား အသိအမှတ် မပြုသည့်နိုင်ငံများဖြစ်သည့် စပိန်နှင့် ဆလိုဗက်ကီးယားနိုင်ငံတို့မှ ကိုယ်စားလှယ် နှစ်ဦး ဦးဆောင်သည့် ဆွေးနွေးပွဲဖြစ်သည့်အတွက် ၎င်းအနေဖြင့် တက်ရောက်သွားမည် မဟုတ်ကြောင်း သမ္မတဟာရှင်သာစီက မြို့တော်ပရီစတီးနား (Pristina) တွင်ပြုလုပ်သည့် သတင်းစာရှင်းလင်းပွဲတွင် သတင်းထောက်များအား ပြောကြားခဲ့ပါသည်။ သို့သော် ၎င်းအနေဖြင့် ဂျာမနီဝန်ကြီးချုပ် အိန်ဂျယ်လာမာကဲ (Angela Merkel) နှင့် ပြင်သစ် သမ္မတ အီမန်နျူရယ်မက်ခရွန် (Emmanuel Macron) တို့ ဦးဆောင်၍ပြုလုပ်သည့် မည်သည့်ဆွေးနွေးပွဲများကိုမဆို တက်ရောက်သွားမည်ဖြစ်ကြောင်း ဟာရှင်သာစီက ပြောကြားခဲ့သည်ဟု သိရှိရပါသည်။

သုံးသပ်ချက်

              ကိုဆိုဗိုသည် စတုရန်းကီလိုမီတာ ၁၀,၈၈၇ ကျယ်ဝန်းကာ ၂၀၂၀ ပြည့်နှစ် ခန့်မှန်းချက်အရ လူဦးရေ ၁.၈ သန်းကျော်ရှိကြောင်း သိရှိရပါသည်။ ၂ဝဝ၇ ခုနှစ် နိုဝင်ဘာလ ၂၈ ရက်တွင် ပါလီမန်ရွေးကောက်ပွဲပြုလုပ်ခဲ့ပြီး ကိုဆိုဗိုသမ္မတအဖြစ် ဖတ်မီးယားဆီဂျေဒီယူအားလည်းကောင်း၊ ဝန်ကြီးချုပ်အဖြစ် ဟာရှင်သာစီအားလည်းကောင်း ရွေးချယ်တင်မြှောက်ခဲ့ပါသည်။ ကိုဆိုဗိုပါလီမန်သည် ရုရှားနှင့် ဆားဘီးယားတို့မှ အပြင်းအထန်ကန့်ကွက်နေသည့် ကြားမှပင် ၂ဝဝ၈ ခုနှစ်၊ ဖေဖော်ဝါရီလ ၁၇ ရက်တွင် အချုပ်အခြာအာဏာပိုင်ဆိုင်သော နိုင်ငံတစ်နိုင်ငံအဖြစ် တစ်ဖက်သတ်လွတ်လပ်ရေး ကြေညာခဲ့ပါသည်။ ဆားဘီးယားနိုင်ငံက ကိုဆိုဗို၏ သီးခြားခွဲထွက်မှုနှင့် လွတ်လပ်ရေး ကြေညာမှုအား မည်သည့်အခါမျှ အသိအမှတ်မပြုနိုင်ကြောင်း ထုတ်ဖော်ပြောကြားထား သလို ဆားဘီးယားနိုင်ငံနှင့် မဟာမိတ်ဖြစ်သည့် ရုရှားနိုင်ငံအပါအဝင် နိုင်ငံအများစု ကလည်း ကန့်ကွက်လျက်ရှိပါသည်။ ကိုဆိုဗိုသည် ၂၀၀၈ ခုနှစ်တွင် ဆားဘီးယား နိုင်ငံမှခွဲထွက်ပြီး တစ်ဖက်သတ်လွတ်လပ်ရေးကြေညာခဲ့ပြီးနောက် ခွဲထွက်ရေးဆိုင်ရာ အရေးပါသည့်ကိစ္စရပ်များဖြေရှင်းရန်အတွက် ဥရောပသမဂ္ဂဦးဆောင်သည့် ဆွေးနွေးမှု များတွင်ပါဝင်ရန် ၂၀၁၃ ခုနှစ်တွင် သဘောတူညီခဲ့ပါသည်။ ဥရောပသမဂ္ဂသည် ကိုဆိုဗို အရေးကိစ္စတွင် ဆားဘီးယားနိုင်ငံနှင့် ကိုဆိုဗိုတို့အကြား ညှိနှိုင်းဖြေရှင်းသူအဖြစ် ဆလိုဗက်ကီးယားသံတမန်ဖြစ်သူ မီလိုဆလပ်စ်လာဂျက်စ်အား မတ်လတွင် ခန့်အပ်ခဲ့ ပြီးနောက် ယခုကဲ့သို့ ကိုဆိုဗိုအရေးကိစ္စဆွေးနွေးရန် စီစဉ်လာခြင်းဖြစ်ပါသည်။ ကိုဆိုဗို အနေဖြင့် အဆိုပါဆွေးနွေးပွဲသို့တက်ရောက်မည့် နိုင်ငံများစာရင်းတွင် ကိုဆိုဗိုခွဲထွက်ရေးအား မထောက်ခံသည့် ဆလိုဗက်ကီးယားနှင့် စပိန်နိုင်ငံတို့ပါဝင်နေ၍ ၎င်းဆွေးနွေးပွဲသို့ တက်ရောက်ရန် ငြင်းဆိုခဲ့ခြင်းဖြစ်ကြောင်း တွေ့ရှိရပါသည်။ ဆားဘီးယားနိုင်ငံမှ ခွဲထွက် ထားသည့် ကိုဆိုဗိုအနေဖြင့် ကုလသမဂ္ဂအဖွဲ့ဝင်နိုင်ငံဖြစ်ရေးနှင့် ဥရောပသမဂ္ဂအဖွဲ့ဝင် နိုင်ငံအဖြစ် အသိအမှတ်ပြုခံရရေးတို့အတွက် ကြိုးပမ်းအားထုတ်လျက်ရှိရာ အမေရိကန်၊ ဗြိတိန်နှင့် အခြားသော ကုလသမဂ္ဂလုံခြုံရေးကောင်စီအဖွဲ့ဝင်နိုင်ငံများက ထောက်ခံ လျက်ရှိသော်လည်း ဆားဘီးယားနိုင်ငံက ကန့်ကွက်ထားသည့်အပြင် ရုရှားနိုင်ငံကလည်း ဗီတိုအာဏာအသုံးပြု၍ ပယ်ချထားသည်ကို တွေ့ရှိရပါသည်။ ထို့ကြောင့် ကိုဆိုဗို၏ သီးခြားလွတ်လပ်သည့်နိုင်ငံတစ်ခုဖြစ်ရေး အသိအမှတ်ပြုရေးကြိုးပမ်းမှုသည် မူလ ဆားဘီးယားနိုင်ငံနှင့် ရုရှားတို့၏ကန့်ကွက်မှုများကြောင့် အောင်မြင်မှုရရှိရန် အလှမ်းဝေး လျက်ရှိကြောင်း သုံးသပ်တင်ပြအပ်ပါသည်။