တူရကီနိုင်ငံနှင့် ဥဇဘက်ကစ္စတန်နိုင်ငံတို့သည် နှစ်နိုင်ငံကုန်သွယ်မှုပမာဏအား တိုးမြှင့်ရန် ကြိုးပမ်းလျက်ရှိခြင်း

 

    တူရကီနိုင်ငံနှင့် ဥဇဘက်ကစ္စတန်နိုင်ငံတို့သည် နှစ်နိုင်ငံကုန်သွယ်မှုပမာဏကို အမေရိကန်ဒေါ်လာ ၁၀ ဘီလီယံအထိမြှင့်တင်သွားရန် ကြိုးပမ်းလျက်ရှိသည်ဟု တူရကီ သမ္မတ ရီဆတ်တေရစ်အာဒိုဂန် (Recep Tayyip Erdogan) က ပြောကြားခဲ့ကြောင်း TRT World သတင်းဌာနက မတ်လ ၃၁ ရက်တွင် ဖော်ပြခဲ့ပါသည်။ ပြီးခဲ့သည့်နှစ်အတွင်း နှစ်နိုင်ငံကုန်သွယ်မှုပမာဏသည်  အမေရိကန်ဒေါ်လာ ၃.၆ ဘီလီယံကျော်အထိရှိကာ ၇၂ ရာခိုင်နှုန်းနီးပါး တိုးမြင့်လာခဲ့ကြောင်း အာဒိုဂန်က ဥဇဘက်ကစ္စတန်သမ္မတ ရှပ်ကတ် မီဇီရိုရက်ဗ် (Shavkat Mirziyoyev) နှင့်အတူပြုလုပ်ခဲ့သည့် သတင်းစာရှင်းလင်းပွဲအတွင်း ပြောကြားခဲ့ပါသည်။ နှစ်နိုင်ငံအနေဖြင့် ၎င်းတို့ရည်မှန်းချက်များအတိုင်း တစ်နှစ်အတွင်း ကုန်သွယ်မှုပမာဏကို ဒေါ်လာ ၅ ဘီလီယံအထိရောက်ရှိရန် အချိန်တိုအတွင်းလုပ်ဆောင် နိုင်မည်ဟု ယုံကြည်ကြောင်းနှင့် နောက်ဆက်တွဲလုပ်ဆောင်မည့် ပူးတွဲဆောင်ရွက်မှု များဖြင့် ရည်မှန်းချက်များကို အကောင်အထည်ဖော်လုပ်ဆောင်သွားမည်ဟု အာဒိုဂန်က ပြောကြားခဲ့ကြောင်း သိရှိရပါသည်။

ဆလိုဗက်ကီးယားနိုင်ငံခြားရေးဝန်ကြီးဌာနသည် ရုရှားသံတမန် ၃၅ ဦးအား နိုင်ငံအတွင်းမှ လျှော့ချရန် ရုရှားသံအမတ်ကြီးအားတောင်းဆိုခဲ့ခြင်း

              ဆလိုဗက်ကီးယားနိုင်ငံခြားရေးဝန်ကြီးဌာနသည် ရုရှားသံအမတ်ကြီး အီဂေါ ဘရက်ချီကော့ဗ် (Igor Bratchikov) အား မတ်လ ၃၀ ရက်တွင် ဆင့်ခေါ်ခဲ့ပြီး ဆလိုဗက်ကီးယားနိုင်ငံအတွင်းမှ ရုရှားသံတမန် ၃၅ ဦးကိုလျှော့ချရန် တောင်းဆိုခဲ့ ကြောင်း Xinhua သတင်းဌာနက မတ်လ ၃၁ ရက်တွင် ရေးသားဖော်ပြခဲ့ပါသည်။ ရုရှား သံတမန်တစ်ဦးသည် Vienna Convention on Diplomatic Relations ကို ချိုးဖောက်မှု၌ ပတ်သက်ဆက်နွှယ်လျက်ရှိသည်ဟူသော ဆလိုဗက်ကီးယားလုံခြုံရေးတပ်ဖွဲ့ဝင်များ၏ သတင်းအချက်အလက်များအပေါ်အခြေခံ၍ အထက်ပါအတိုင်း ဆုံးဖြတ်ခဲ့ခြင်းဖြစ်ကြောင်း ဆလိုဗက်ကီးယားနိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားပါသည်။ ဆလိုဗက်ကီးယားအစိုးရသည် လျို့ဝှက်ထောက်လှမ်းရေးဌာန၏ သတင်းအချက်အလက် များကို ကိုးကား၍ ရုရှားသံတမန် ၃ ဦးအား မတ်လ ၁၄ ရက်တွင် နိုင်ငံအတွင်းမှ နှင်ထုတ်ခဲ့ကြောင်း သတင်းအချက်အလက်များ၏ ထုတ်ပြန်ချက်အရ သိရှိရပါသည်။

ပိုလန်နိုင်ငံအနေဖြင့် ယခုနှစ်ကုန်တွင် ရုရှားနိုင်ငံ၏ စွမ်းအင်ဆိုင်ရာတင်ပို့မှုများအား ရပ်ဆိုင်းသွားမည်ဆိုခြင်း

 

Tvpworld;Mar-30(Wed)

              ပိုလန်နိုင်ငံအနေဖြင့် ၂၀၂၂ ခုနှစ် နှစ်ကုန်ပိုင်းတွင် ရုရှားနိုင်ငံမှတင်သွင်းသော ရေနံ၊ သဘာဝဓာတ်ငွေ့နှင့် ကျောက်မီးသွေးများအား ရပ်ဆိုင်းမည့်အစီအစဉ်တစ်ရပ်ကို မတ်လ ၃၀ ရက်တွင်ပြုလုပ်သည့် သတင်းစာရှင်းလင်းပွဲ၌ ပိုလန်ဝန်ကြီးချုပ် မာတက်စ်ဇ် မိုရာဝီခ်ကီ (Mateusz Morawiecki) က ပြောကြားခဲ့ကြောင်း Tvpworld သတင်းဌာနက ဖော်ပြခဲ့ပါသည်။ အဆိုပါအစီအစဉ်တွင် ရုရှားနိုင်ငံ၏ စွမ်းအင်အရင်းအမြစ်များအပေါ် မှီခိုမှုကင်းလွတ်စေရေးအတွက် ပိုလန်နိုင်ငံ၏ ဦးဆောင်မှုနောက်တွင် အခြားသောဥရောပ နိုင်ငံများအနေဖြင့် ပူးပေါင်းပါဝင်သွားရန် မိုရာဝီခ်ကီက တိုက်တွန်းပြောကြားခဲ့ပါသည်။ ရုရှားနိုင်ငံမှ ပိုလန်နိုင်ငံသို့တင်သွင်းသော ကျောက်မီးသွေးတင်ပို့မှုများကို ဧပြီလ၊ သို့မဟုတ် မေလတွင် နောက်ဆုံးထား၍ ပိတ်ပင်သွားမည်ဖြစ်ကြောင်းနှင့် ပိုလန်နိုင်ငံအနေဖြင့် ရုရှားစွမ်းအင်ကုမ္ပဏီတစ်ခုဖြစ်သော Gazprom နှင့် ဓာတ်ငွေ့တင်ပို့မှုဆိုင်ရာသဘောတူ စာချုပ်မှာ သက်တမ်းကုန်ဆုံးတော့မည်ဖြစ်ပြီး အဆိုပါသဘောတူစာချုပ်အား ထပ်မံ သက်တမ်းတိုးသွားမည်မဟုတ်ကြောင်း ၎င်းက ဆက်လက်ပြောကြားခဲ့ပါသည်။ ပိုလန် နိုင်ငံသည် ရုရှားမှတင်သွင်းသည့် ဓာတ်ငွေ့များအား အစားထိုးတင်သွင်းရန်အတွက် ဘောလ်တစ်ပိုက်လိုင်းသစ်မှတစ်ဆင့် နော်ဝေနိုင်ငံမှ သဘာဝဓာတ်ငွေ့အရည်များအား ဝယ်ယူဖြည့်တင်းသွားမည်ဖြစ်ပါသည်။

              အလားတူ အမေရိကန်နှင့်ကာတာနိုင်ငံတို့မှ သဘာဝဓာတ်ငွေ့များဝယ်ယူမည့် သဘောတူစာချုပ်အသစ်များတွင်လည်း ပိုလန်နိုင်ငံအနေဖြင့် လက်မှတ်ရေးထိုးသွား မည်ဖြစ်ကြောင်းနှင့် ဘောလ်တစ်ပင်လယ်ရှိ ပိုလန်နိုင်ငံ၏ ဆိပ်ကမ်းမြို့တစ်ခုဖြစ်သည့် Swinoujscie မြို့၌လည်း ဓာတ်ငွေ့သိုလှောင်ရုံအသစ်တစ်ခု ထပ်မံတိုးချဲ့တည်ဆောက် သွားမည်ဖြစ်ပါသည်။ ရုရှားနိုင်ငံမှ ပိုလန်နိုင်ငံသို့ Druzhba ရေနံပိုက်လိုင်းမှတစ်ဆင့် ရေနံတင်ပို့မှုများကိုလည်း မကြာမီ တင်သွင်းမှုများရပ်ဆိုင်းတော့မည်ဖြစ်ကြောင်း ပိုလန် ရာသီဥတုနှင့်ပတ်ဝန်းကျင်ရေးရာဝန်ကြီး အန်နာမောစ့်စကီဖာ (Anna Moskwa) က ပြောကြားခဲ့ပါသည်။ ရုရှားနိုင်ငံ၏ သဘာဝရုပ်ကြွင်းလောင်စာများအပေါ် မှီခိုနေရခြင်းမှ လုံးဝကင်းလွတ်စေနိုင်ရေးအတွက် ပိုလန်နိုင်ငံ၏ ရေရှည်အစီအမံတစ်ခုဖြစ်သည့် ၂၀၄၀ ပြည့်နှစ် စွမ်းအင်မူဝါဒလမ်းစဉ်အရ စွမ်းအင်လုံလောက်စွာထောက်ပံ့ပေးနိုင်ရေးအတွက် နျူကလီးယားစွမ်းအင်နှင့် ပြန်လည်ပြည့်ဖြိုးမြဲစွမ်းအင်ကဏ္ဍတို့တွင် တိုးမြှင့်ဖော်ဆောင် လျက်ရှိပါသည်။ ရုရှားနိုင်ငံအနေဖြင့် စစ်ရေးပဋိပက္ခအတွင်း ခြိမ်းခြောက်မှုတစ်ရပ် အဖြစ် စွမ်းအင်အရင်းအမြစ်များကို အသုံးပြုလျက်ရှိကြောင်းနှင့် အဆိုပါခြိမ်းခြောက်မှု အား ဥရောပနိုင်ငံများအနေဖြင့် အတူတကွပူးပေါင်းဖြေရှင်းသွားရန် ပိုလန်ဝန်ကြီးချုပ် မိုရာဝီခ်ကီက တိုက်တွန်းပြောကြားခဲ့ကြောင်း သိရှိရပါသည်။

သုံးသပ်ချက်

              ရုရှားနိုင်ငံအနေဖြင့် ကမ္ဘာပေါ်တွင် စွမ်းအင်ထုတ်လုပ်သည့်နိုင်ငံများစာရင်းတွင် အများဆုံးထုတ်လုပ်သည့်နိုင်ငံများထဲမှ တစ်နိုင်ငံဖြစ်ပါသည်။ ယူကရိန်းနိုင်ငံအား ရုရှားနိုင်ငံက အထူးစစ်ဆင်ရေးတစ်ရပ်အဖြစ် တိုက်ခိုက်မှုများပြုလုပ်ခဲ့ပြီးနောက် ဥရောပ နိုင်ငံများအပါအဝင် အမေရိကန်ဦးဆောင်သော အနောက်အုပ်စုတို့သည် ရုရှားနိုင်ငံအပေါ် အရေးယူပိတ်ဆို့မှုများချမှတ်ကာ အဆက်မပြတ်ဖိအားပေးမှုများ လုပ်ဆောင်လျက်ရှိပါ သည်။ သို့သော် ဥရောပနိုင်ငံအများစုနေဖြင့် ရုရှားနိုင်ငံ၏ သဘာဝဓာတ်ငွေ့၊ ရေနံနှင့် ကျောက်မီးသွေးများအပေါ် မှီခိုနေရသောကြောင့် ရုရှားနိုင်ငံ၏ စွမ်းအင်ဆိုင်ရာ တင်ပို့မှု များနှင့်စပ်လျဉ်း၍ အမေရိကန်ဦးဆောင်သော အနောက်အုပ်စုများအနေဖြင့် စွမ်းအင် ကဏ္ဍအပေါ် ကန့်သတ်ချက်များချမှတ်ကာ အရေးယူပိတ်ဆို့မှုများ လုပ်ဆောင်လျက်ရှိ သည်ကို တွေ့ရှိရပါသည်။ ပိုလန်နိုင်ငံအနေဖြင့် ရုရှားနိုင်ငံအား စီးပွားရေးဆိုင်ရာဖိအား ပေးမှုများ တိုးမြှင့်လုပ်ဆောင်ရန်ရည်ရွယ်၍ ရုရှားနိုင်ငံမှတင်ပို့သော သဘာဝဓာတ်ငွေ့၊ ရေနံနှင့် ကျောက်မီးသွေးတင်သွင်းမှုများအား ရပ်ဆိုင်းသွာမည်ဖြစ်ကြောင်းနှင့် ရုရှားနိုင်ငံ အပေါ် စွမ်းအင်ဆိုင်ရာအရေးယူပိတ်ဆို့မှုများ တိုးမြှင့်ချမှတ်သွားရန် ဥရောပသမဂ္ဂအား တောင်းဆိုခဲ့ကြောင်း တွေ့ရှိရပါသည်။ ပိုလန်နိုင်ငံသည် ရုရှားနိုင်ငံမှဝယ်ယူသည့် စွမ်းအင်များနေရာတွင် အစားထိုးနိုင်ရန်အတွက် သဘာဝဓာတ်ငွေ့နှင့် ရေနံများကို အမေရိကန်၊ ကာတာနှင့် နော်ဝေးနိုင်ငံများမှ ဝယ်ယူဖြည့်တင်းသွားမည်ဖြစ်ပါသည်။ သို့ဖြစ်၍ ရုရှားနိုင်ငံမှ သဘာဝဓာတ်ငွေ့၊ ရေနံနှင့် ကျောက်မီးသွေး ဝယ်ယူမှုများအား ရပ်တန့်ခဲ့မည်ဆိုပါက ပိုလန်နိုင်ငံအနေဖြင့် လာမည့်ဆောင်းရာသီကာလတွင် ၎င်းနိုင်ငံ၏ စွမ်းအင်လိုအပ်ချက်များကို အချိန်မီဖြည့်တင်းပေးနိုင်ခြင်းမရှိသဖြင့် နိုင်ငံအတွင်း နိုင်ငံရေး မတည်ငြိမ်မှုများ ဖြစ်ပေါ်လာနိုင်ဖွယ်ရှိကြောင်းနှင့် စွမ်းအင်ဈေးနှုန်းများမှာလည်း မြင့်တက် လာနိုင်ဖွယ်ရှိကြောင်း သုံးသပ်တင်ပြအပ်ပါသည်။

တူရကီသမ္မတသည် ဥဇဘက်ကစ္စတန်နိုင်ငံသို့ချစ်ကြည်ရေးသွားရောက်ခဲ့ခြင်း

 

တူရကီသမ္မတ ရီဆတ်တေရစ်အာဒိုဂန် ( Recep Tayyip Erdogan ) သည်  နှစ်နိုင်ငံအကြား သံတမန်ဆက်ဆံရေး နှစ် (၃၀) ပြည့်အထိမ်းအမှတ်အဖြစ် မတ်လ ၂၉ ရက်မှ ၃၁ ရက်အထိ ဥဇဘက်ကစ္စတန်နိုင်ငံသို့ အလုပ်သဘောခရီးစဉ် သွားရောက်မည်ဖြစ်ကြောင်း akipress သတင်းဌာနက မတ်လ ၂၆ ရက်တွင် ဖော်ပြ ခဲ့ပါသည်။ အာဒိုဂန်၏  အဆိုပါခရီးစဉ်အတွင်း  တူရကီ-ဥဇဘတ်ကစ္စတန် နှစ်နိုင်ငံ အကြား ကုန်သွယ်မှုတန်ဖိုးအား အမေရိကန်ဒေါ်လာ ၁၀ ဘီလီယံအထိ ရောက်ရှိရန် မျှော်မှန်းဆောင်ရွက်သွားရန် ဆွေးနွေးပြောဆိုမည်ဖြစ်ကြောင်း ဥဇဘက်ကစ္စတန် ဆိုင်ရာ တူရကီသံအမတ်ကြီးက ပြောကြားထားပါသည်။ တူရကီနှင့်  ဥဇဘက် ကစ္စတန်ခေါင်းဆောင် ၂ ဦး၏ နောက်ဆုံးအကြိမ် တွေ့ဆုံခဲ့သည့် အစည်းအဝေး၌ နှစ်နိုင်ငံအကြား ကုန်သွယ်မှုတန်ဖိုးအား အမေရိကန်ဒေါ်လာ ၅ ဘီလီယံအထိ ရောက်ရှိရေး ရည်မှန်းကြိုးပမ်းရန် ပြောဆိုထားခဲ့ကြကြောင်း သိရှိရပါသည်။