တူကီယဲ၊ ရုရှား၊ အီရန်နှင့် ဆီးရီးယား လေးနိုင်ငံဆွေးနွေးပွဲ ပြုလုပ်သွားမည်ဆိုခြင်း

 တူကီယဲ၊ ရုရှား၊ အီရန်နှင့် ဆီးရီးယားနိုင်ငံများအနေဖြင့် လေးနိုင်ငံဆွေးနွေးပွဲကို မေလ ၁၀ ရက်တွင် ပြုလုပ်သွားရန် ရုရှားနိုင်ငံက အတည်ပြုခဲ့ကြောင်း တူကီယဲ နိုင်ငံခြားရေးဝန်ကြီး မက်ဗလက်ကာဗူဆိုဂလူ (Mevlut Cavusoglu) က ပြောကြားခဲ့ သည်ဟု Anadolu Agency သတင်းဌာနက မေလ ၆ ရက်တွင် ဖော်ပြခဲ့ပါသည်။ တူကီယဲ၊ ရုရှားနှင့် ဆီးရီးယားနိုင်ငံများ၏ ကာကွယ်ရေးဝန်ကြီးများနှင့် ထောက်လှမ်းရေး အကြီးအကဲများသည် ၂၀၂၂ ခုနှစ်၊ ဒီဇင်ဘာလတွင် ရုရှားနိုင်ငံ၊ မြို့တော် မော်စကို (Moscow) ၌ တွေ့ဆုံဆွေးနွေးမှုများပြုလုပ်ခဲ့ပြီး ဆီးရီးယားနှင့် ဒေသတွင်းတည်ငြိမ်ရေး အတွက် သုံးပွင့်ဆိုင်ဆွေးနွေးမှုများပြုလုပ်ရန် သဘောတူညီမှုများရရှိခဲ့ပါသည်။ ၎င်းနောက် ပြုလုပ်သောဆွေးနွေးပွဲများ၌ အီရန်နိုင်ငံ၏ပါဝင်လာမှုကို အားပေးထောက်ခံကြောင်း ကာဗူဆိုဂလူက ပြောကြားခဲ့သည်ဟု သိရှိရပါသည်။