၇။ တူရကီနိုင်ငံ၌ ၂၀၁၉ ခုနှစ်တွင် တပ်ဖြန့်ချထားသော S-400 လေကြောင်းရန် ကာကွယ်ရေးစနစ်၏ ရေဒါစနစ်များသည် နေတိုးတပ်ဖွဲ့၏ ကာကွယ်ရေးဆိုင်ရာ အခြေခံအဆောက်အအုံများအား ခြိမ်းခြောက်မှုဖြစ်ပေါ်စေသည့်အတွက် ၎င်း၏ပိုင်နက် အတွင်းမှ ဖယ်ရှားပေးရေး အမေရိကန်နိုင်ငံက အကြိမ်ကြိမ်တောင်းဆိုမှုများ ပြုလုပ် ခဲ့ပါသည်။ သို့သော်လည်း နိုင်ငံ၏လုံခြုံရေးအား အထောက်အပံ့ပေးနိုင်ရန်အတွက် ရုရှားနိုင်ငံထုတ် အဆိုပါ ကာကွယ်ရေးစနစ်များလိုအပ်ကြောင်း တူရကီအစိုးရက ထုတ်ပြန်ခဲ့ပါသည်။ အဆိုပါ ထုတ်ပြန်ချက်နှင့်စပ်လျဉ်း၍ နေတိုးတပ်ဖွဲ့၏ F-35 ဂျက်တိုက်လေယာဉ်အစီအစဉ်မှ တူရကီနိုင်ငံအား ရပ်ဆိုင်းခဲ့သည့်အပြင် ၂၀၂၀ ပြည့်နှစ်၊ ဒီဇင်ဘာလတွင် အမေရိကန်နိုင်ငံက တူရကီနိုင်ငံအပေါ် အရေးယူပိတ်ဆို့မှုများ ချမှတ်ခဲ့ပါသည်။ အမေရိကန်အနေဖြင့် ဆီးရီးယားရှိ ကာ့ဒ်တပ်ဖွဲ့ဝင်များအပေါ် ထောက်ပံ့မှုများအား ပြန်လည်စဉ်းစားသုံးသပ်သွားမည်ဆိုပါက တူရကီနိုင်ငံသည် ရုရှားနိုင်ငံထံမှ ဒုံးကျည်ဝယ်ယူမှုနှင့်ပတ်သက်၍ ညှိနှိုင်းမှုများလုပ်ဆောင်သွားရန် ဆန္ဒရှိကြောင်း တူရကီကာကွယ်ရေးဝန်ကြီး ဟူလူဆီအကာ (Hulusi Akar) က ပြောကြားခဲ့သည်ဟု သိရှိရပါသည်။
No comments:
Post a Comment