မော်ဒိုဗာတွင် ကြားဖြတ်လွှတ်တော်ရွေးကောက်ပွဲများကျင်းပခဲ့ခြင်း

Xinhua; Jul-11(Sun)

    မော်ဒိုဗာသမ္မတနိုင်ငံတွင် ကြားဖြတ်လွှတ်တော်ရွေးကောက်ပွဲတစ်ရပ်အား ဇူလိုင်လ ၁၁ ရက်တွင် စတင်ကျင်းပပြုလုပ်ခဲ့ပြီး မဲဆန္ဒရှင်ပြည်သူပေါင်း ၃ သန်းကျော် ဝင်ရောက်၍ ဆန္ဒမဲပေးခြင်းပြုလုပ်ခဲ့ကြောင်း Xinhua သတင်းဌာနကဖော်ပြခဲ့ပါသည်။ အဆိုပါကြားဖြတ်ရွေးကောက်ပွဲတွင် နိုင်ငံရေးပါတီ ၂၀ ခု၊ အကျိုးတူးပူးပေါင်းထားသည့် ညွန့်ပေါင်းပါတီ ၂ ခုနှင့် သီးခြားလွတ်လပ်သည့် ရွေးကောက်ခံကိုယ်စားလှယ် ၁ ဦးတို့ ပါဝင်ယှဉ်ပြိုင်ခဲ့ကြပါသည်။ လက်ရှိရွေးကောက်ပွဲတွင်ပါဝင်သည့် ပါတီအရေအတွက် သည် ၂၀၁၉ ခုနှစ်အစောပိုင်းကပြုလုပ်ခဲ့သည့် ရွေးကောက်ပွဲထက် ပါတီအရေအတွက် ပိုမိုများပြားလျက်ရှိပါသည်။ သို့သော်လည်း အဆိုပါရွေးကောက်ပွဲတွင် ပြီးခဲ့သည့် ၂၀၂၀ ပြည့်နှစ်နှောင်းပိုင်း၌ပြုလုပ်ခဲ့သည့် သမ္မတရွေးကောက်ပွဲတွင် အနိုင်ရရှိခဲ့သည့် သမ္မတ မီယာဆန်ဒူ (Maia Sandu) ဦးဆောင်သည့် လှုပ်ရှားမှုနှင့် သွေးစည်းညီညွတ်မှု ပါတီ (Party of Action and Solidarity- PAS) နှင့် ကွန်မြူနစ်များနှင့် ဆိုရှယ်လစ် များ၏ ညွန့်ပေါင်းပါတီ (Electoral Bloc of Communists and Socialists-EBCS) တို့ အကြားတွင်သာ အဓိကယှဉ်ပြိုင်နေကြသည်ဟု ပြည်သူများက ယုံကြည်လျက်ရှိပါသည်။

        လွှတ်တော်သို့ဝင်ရောက်နိုင်ရန်အတွက် ပါတီများအနေဖြင့် ဆန္ဒမဲစုစုပေါင်း၏ ၅ ရာခိုင်နှုန်းနှင့် ညွန့်ပေါင်းပါတီများအနေဖြင့် ၇ ရာခိုင်နှုန်းကိုရရှိရမည်ဖြစ်ပြီး တစ်သီး ပုဂ္ဂလကိုယ်စားလှယ်လောင်းများသည်လည်း အနိမ့်ဆုံး ၂ ရာခိုင်နှုန်းရရှိရမည်ဖြစ်ပါ သည်။ မော်ဒိုဗာနိုင်ငံအတွင်းရှိ မဲရုံပေါင်း ၂,၀၀၀ နှင့် ပြည်ပနိုင်ငံများရှိ မဲရုံပေါင်း ၁၅၀ အား ဒေသစံတော်ချိန် နံနက် ၇ နာရီတွင် စတင်ဖွင့်လှစ်၍ ည ၉ နာရီအချိန်တွင် ပိတ်သိမ်း ခဲ့ကြောင်း ဗဟိုရွေးကောက်ပွဲကော်မရှင်က ထုတ်ပြန်ကြေညာခဲ့ပါသည်။ ဆန္ဒမဲ ၉၉.၆၃ ရာခိုင်နှုန်းရေတွက်ပြီးချိန်အထိ ရလဒ်များအရ PAS ပါတီသည် ၅၂.၆၀ ရာခိုင်နှုန်း ရရှိကာ မဲအများဆုံးဖြင့်ဦးဆောင်လျက်ရှိကြောင်းနှင့် ၎င်း၏အဓိကပြိုင်ဘက်ပါတီဖြစ် သည့် EBCS ပါတီသည် ၂၇.၃၂ ရာခိုင်နှုန်းဖြင့် ဒုတိယနေရာတွင်ရပ်တည်လျက်ရှိ ကြောင်း ဗဟိုရွေးကောက်ပွဲကော်မရှင်က ဇူလိုင်လ ၁၂ ရက်၌ ထုတ်ပြန်ခဲ့ကြေညာ ခဲ့သည်ဟု သိရှိရပါသည်။