အစ္စလာမ္မစ်ပူးပေါင်းဆောင်ရွက်ရေးအဖွဲ့ ၏ ဝန်ကြီးများအစည်းအဝေးကို တူကီယဲနိုင်ငံ၌ ကျင်းပပြုလုပ်ခဲ့ခြင်း

(၃၈) ကြိမ်မြောက် အစ္စလာမ္မစ်ပူးပေါင်းဆောင်ရွက်ရေးအဖွဲ့ (Organization of Islamic Cooperation-OIC) ၏ ဝန်ကြီးများအစည်းအဝေးကို တူကီယဲနိုင်ငံ၊ အစ္စတန်ဘူလ်မြို့ (Istanbul) ၌ နိုဝင်ဘာလ ၂၆ ရက်မှ ၂၉ ရက်အထိ ၄ ရက်ကြာ ပြုလုပ်လျက်ရှိပါသည်။ အဆိုပါအစည်းအဝေးတွင် ဝန်ကြီးများအနေဖြင့် OIC အဖွဲ့ဝင် နိုင်ငံများမှ ကိုယ်စားလှယ်များနှင့်တွေ့ဆုံ၍ ကမ္ဘာ့နိုင်ငံအသီးသီးတွင် ဖြစ်ပေါ်နေသည့် စီးပွားရေးဆိုင်ရာ ဖွံ့ဖြိုးတိုးတက်မှုအခြေအနေများကို ဆွေးနွေးသွားမည်ဖြစ်ပါသည်။ အဆိုပါအစည်းအဝေး၏ ပထမ ၂ ရက်အတွင်း OIC အဖွဲ့ဝင်နိုင်ငံများမှ ဝန်ကြီးများ အနေဖြင့် ၂၀၂၅ ခုနှစ် OIC အစီအစဉ်အပြည့်အဝအကောင်အထည်ဖော်ဆောင်ရွက်ရေး အပါအဝင် လုပ်ငန်းစဉ်မူကြမ်းများနှင့် ဆုံးဖြတ်ချက်များကို ချမှတ်သွားမည်ဖြစ်ကြောင်း သိရှိရပါသည်။