အမေရိကန်သည် F-35 တိုက်လေယာဉ်ပူးတွဲထုတ်လုပ်မှုစီမံကိန်း၏ တရားဝင်ဝဘ်ဆိုက်မှ တူရကီအား ဖယ်ရှားခဲ့ခြင်း

Arabnews; Jul-19(Sun)

            အမေရိကန်နိုင်ငံသည် F-35 တိုက်လေယာဉ်ပူးတွဲထုတ်လုပ်မှုစီမံကိန်း၏ တရားဝင်ဝဘ်ဆိုက်တွင် ဖော်ပြထားသည့် တူရကီနိုင်ငံ၏ အမည်စာရင်းအား ဖယ်ရှား ခဲ့ကြောင်း၊ ထိုကဲ့သို့ဖယ်ရှားမှုသည် တူရကီနိုင်ငံအနေဖြင့် ရုရှားနိုင်ငံမှ S-400 လေကြောင်းရန် ကာကွယ်ရေးဒုံးကျည်စနစ်များ ဝယ်ယူမှုနှင့်စပ်လျဉ်း၍ နောက်ဆုံးအကြိမ် ဆုံးဖြတ်ချက် ချမှတ်သွားရန် ဖိအားပေးမှုတစ်ခုသာဖြစ်ကြောင်း Arabnews သတင်းဌာနက ဇူလိုင်လ ၁၉ ရက်တွင် ဖော်ပြခဲ့ပါသည်။ တူရကီနိုင်ငံအနေဖြင့် ရုရှားနိုင်ငံထံမှ S-400 လေကြောင်းရန် ကာကွယ်ရေးဒုံးကျည်စနစ်၏ အစိတ်အပိုင်းများအား ၂၀၁၉ ခုနှစ်၊ ဇူလိုင်လတွင် လက်ခံ ရရှိခဲ့ပြီးနောက် အမေရိကန်နိုင်ငံသည် F-35 တိုက်လေယာဉ်ပူးတွဲထုတ်လုပ်မှုစီမံကိန်းမှ တူရကီနိုင်ငံ၏ ပါဝင်ဆောင်ရွက်မှုများကို ဆိုင်းငံ့ခဲ့ပါသည်။ ထို့ပြင် F-35  တိုက်လေယာဉ်များ ရောင်းချသွားမည့်အစီအစဉ်ကိုလည်း အမေရိကန်နိုင်ငံက ငြင်းပယ်ခဲ့ပါသည်။

              တူရကီနိုင်ငံသည် အဆိုပါဒုံးကျည်စနစ်များအား ၂၀၂၀ ပြည့်နှစ်၊ ဧပြီလတွင် စတင် အသုံးပြုရန် စီစဉ်ထားရှိသော်လည်း လက်ရှိအချိန်အထိ အသုံးပြုနိုင်ခြင်းမရှိသေးကြောင်း အဆိုပါသတင်းဌာနက ဖော်ပြခဲ့ပါသည်။ တူရကီနိုင်ငံသည် အမေရိကန်နိုင်ငံမှ ဦးဆောင် ပြုလုပ်လျက်ရှိသည့် F-35 တိုက်လေယာဉ်များ ပူးတွဲထုတ်လုပ်ရေးစီမံကိန်းတွင် ဗြိတိန်၊ သြစတြေးလျ၊ အီတလီ၊ နော်ဝေ၊ နယ်သာလန်၊ ဒိန်းမတ်နှင့် ကနေဒါနိုင်ငံတို့နှင့် အတူပူးပေါင်းဆောင်ရွက်လျက်ရှိပါသည်။ အဆိုပါစီမံကိန်းအရ တူရကီကုမ္ပဏီ ၁၀ ခုသည် F-35  တိုက်လေယာဉ်များအတွက် အမေရိကန်ဒေါ်လာ ၁၂ ဘီလီယံခန့် တန်ဖိုးရှိသည့် အစိတ်အပိုင်း ၉၀၀ ကျော်ကို ထုတ်လုပ်ပေးသွားရမည်ဖြစ်ကြောင်း သိရှိရပါသည်။

သုံးသပ်ချက်

             တူရကီနိုင်ငံသည် အမေရိကန်နိုင်ငံမှ ဉီးဆောင်ပြုလုပ်လျက်ရှိသည့် အမေရိကန် ဒေါ်လာ ၄၀၀ ဘီလီယံတန်ဖိုးရှိသော F-35 တိုက်လေယာဉ်များ ပူးတွဲထုတ်လုပ်ရေး စီမံကိန်းတစ်ခုတွင် ဗြိတိန်၊ သြစတြေးလျ၊ အီတလီ၊ နော်ဝေ၊ နယ်သာလန်၊ ဒိန်းမတ်နှင့် ကနေဒါနိုင်ငံတို့နှင့်အတူ ပူးပေါင်းပါဝင်ခဲ့သည့်အပြင် F-35 တိုက်လေယာဉ် ၁၁၆ စီးဝယ်ယူသွားရန်အတွက်လည်း စီစဉ်ထားရှိပါသည်။ အဆိုပါစီမံကိန်းအရ တူရကီကုမ္ပဏီ ၁၀ ခုသည် F-35  တိုက်လေယာဉ်များအတွက် အမေရိကန်ဒေါ်လာ ၁၂ ဘီလီယံခန့်တန်ဖိုးရှိသည့် အစိတ်အပိုင်း ၉၀၀ ကျော်ကို ထုတ်လုပ်ပေးသွားရမည် ဖြစ်ပါသည်။ တူရကီနှင့် အမေရိကန်နိုင်ငံတို့အကြား ထိုကဲ့သို့ ပူးပေါင်းဆောင်ရွက် မှုများပြုလုပ်နေစဉ်အတွင်း တူရကီနိုင်ငံသည် အမေရိကန်နိုင်ငံ၏ ရန်ဘက်ဖြစ်သည့် ရုရှားနိုင်ငံထံမှ အမေရိကန်ဒေါ်လာ ၂.၅ ဘီလီယံတန်ဖိုးရှိသော S-400 လေကြောင်းရန် ကာကွယ်ရေးဒုံးကျည်စနစ်များအား ဝယ်ယူခဲ့သည့်အတွက် အမေရိကန်နိုင်ငံက ပြင်းထန်စွာကန့်ကွက်ခဲ့ပါသည်။ ထိုကဲ့သို့အချိန်တွင် တူရကီနိုင်ငံသည် ရုရှားနိုင်ငံထံမှ S-400  ဒုံးကျည်စနစ်များအား ၂၀၁၉ ခုနှစ်၊ ဇူလိုင်လ ၁၂ ရက်တွင် လက်ခံရရှိခဲ့ပြီး ဒုတိယ အသုတ်ရရှိရေးအတွက်လည်း ဆောင်ရွက်လျက်ရှိရာ အမေရိကန်နိုင်ငံက တုံ့ပြန်သည့် အနေဖြင့် F-35 တိုက်လေယာဉ်ပူးတွဲထုတ်လုပ်မှုစီမံကိန်း၏ တရားဝင်ဝဘ်ဆိုက်မှ  တူရကီနိုင်ငံအား ဖယ်ရှားခဲ့ရုံသာမက တူရကီနိုင်ငံရှိ F-35 တိုက်လေယာဉ်များအတွက် လိုအပ်သော လေ့ကျင့်မှုများပြုလုပ်ပေးခြင်းကို အကန့်အသတ်မရှိ ဆိုင်းငံ့ထားခဲ့ပါသည်။ အမေရိကန်နိုင်ငံအနေဖြင့် တူရကီနိုင်ငံ၏ ရန်ဘက်ဖြစ်သည့် ကာ့ဒ်သူပုန်များအပေါ် လက်နက်များတပ်ဆင်ပေးခဲ့ခြင်း၊ ပက်ထရီးရော့ (Patriot) ဒုံးကျည်များအား တူရကီ နိုင်ငံသို့ရောင်းချရန် ငြင်းဆိုခဲ့ခြင်းတို့ကြောင့် တူရကီနိုင်ငံသည် အမေရိကန်နိုင်ငံအပေါ် ယုံကြည်မှုလျော့ပါးလာကာ စစ်ဘက်အခန်းကဏ္ဍမြှင့်တင်ရာတွင် ရုရှားနိုင်ငံကို အားထား လာခဲ့သည်ကို တွေ့ရှိရပါသည်။ သို့ဖြစ်ပါ၍ တူရကီနှင့် အမေရိကန်နှစ်နိုင်ငံအကြား ဆက်ဆံရေးတင်းမာမှုများ ရှိလာနိုင်မည်ဖြစ်ကြောင်း သုံးသပ်တင်ပြအပ်ပါသည်။