Anadolu Agency; Dec-12(Mon)
ဥရောပကော်မရှင်သည် တူကီယဲနိုင်ငံ၏ နယ်စပ်ထိန်းချုပ်ရေးအစီအစဉ် ခိုင်မာအားကောင်းလာစေရန်နှင့် ဒုက္ခသည်များအတွက် အကူအညီများပေးအပ်ရန် ယူရို သန်း ၂၂၀ (အမေရိကန်ဒေါ်လာ ၂၃၂ သန်း) တန်ဖိုးရှိသည့် အကူအညီများ ပေးအပ် သွားမည်ဖြစ်ကြောင်း ဒီဇင်ဘာလ ၁၂ ရက်တွင် အတည်ပြုပြောကြားခဲ့ပါသည်။ ၎င်းအကူအညီများသည် တူကီယဲနိုင်ငံသို့ တရားမဝင်ရွှေ့ပြောင်းအခြေချနေထိုင်သူများ ဝင်ရောက်မှုရပ်တန့်ရေးနှင့် ဂရိကျွန်းစုများမှ ရွှေ့ပြောင်းဒုက္ခသည်များ နေရပ်ပြန်လည် စေလွှတ်ရေးအပါအဝင် ဒုက္ခသည်အရေးနှင့်ပတ်သက်၍ တူကီယဲနိုင်ငံနှင့် ပူးပေါင်း ဆောင်ရွက်မှု လုပ်ဆောင်သွားမည့် ဥရောပသမဂ္ဂ၏ ကတိကဝတ်အား ပြသခြင်းဖြစ်ကြောင်း ဥရောပကော်မရှင်မှ တာဝန်ရှိသူ အိုလီဗာဗာဟေလီ (Oliver Varhelyi) က ပြောကြား ခဲ့ပါသည်။
ဥရောပကော်မရှင်အနေဖြင့် တူကီယဲနိုင်ငံ၏ အရှေ့ဘက်နယ်စပ်မှ တရားမဝင် ရွှေ့ပြောင်းအခြေချနေထိုင်သူများ ဝင်ရောက်မှုကို ကာကွယ်တားဆီးနိုင်ရန်အတွက် တူကီယဲနိုင်ငံသို့ ခေတ်မီထောက်လှမ်းရေးကိရိယာများ ထောက်ပံ့ပေးသွားမည်ဖြစ်ကြောင်း ၎င်းက ပြောကြားခဲ့ပါသည်။ ၂၀၂၂ ခုနှစ်တွင် တူကီယဲနိုင်ငံသို့ ပေးအပ်ခဲ့သည့် ဥရောပသမဂ္ဂ၏ အကူအညီ စုစုပေါင်းသည် ယူရို ၁.၂၃၅ ဘီလီယံခန့်ရှိပြီဖြစ်ကြောင်းနှင့် အဆိုပါအကူအညီများသည် ဒုက္ခသည်များ၏ အခြေခံလိုအပ်ချက်များအတွက် ကုန်ကျစရိတ်များ ကာမိစေရန်၊ အလုပ်အကိုင်အခွင့်အလမ်းများ များပြားလာစေရန်၊ ဒုက္ခသည်အဖွဲ့အစည်းများအား ငွေသားအကူအညီများပေးအပ်ရန်နှင့် တူကီယဲအရှေ့ဘက်နယ်စပ်ထိန်းချုပ်မှု ခိုင်မာ အားကောင်းလာစေရန်တို့အတွက် ခွဲဝေပေးအပ်ခဲ့ခြင်းဖြစ်ကြောင်း ၎င်းက ဆက်လက် ပြောကြားခဲ့ပါသည်။ လက်ရှိတွင် တူကီယဲနိုင်ငံတွင် မှတ်ပုံတင်ထားသည့် ဒုက္ခသည်နှင့် ခိုလှုံခွင့်တောင်းခံသူ ၄ သန်းကျော်ရှိပြီး ၎င်းတို့အနက် ၃.၆ သန်းနီးပါးသည် ဆီးရီးယား နိုင်ငံသားများဖြစ်ကြောင်း သိရှိရပါသည်။
No comments:
Post a Comment