Anadolu Agency; Dec-9(Fri)
ကိုဆိုဗိုအစိုးရနှင့် ဆာ့ဘ်လူမျိုးစုတို့အကြား တင်းမာမှုများမြင့်တက်နေချိန်တွင် ကိုဆိုဗိုမြောက်ပိုင်းသို့ ရဲတပ်ဖွဲ့ဝင်များ ပိုမိုတပ်ဖြန့်ချထားလျက်ရှိကြောင်း ကိုဆိုဗို ပြည်ထဲရေးဝန်ကြီးဌာနက ဒီဇင်ဘာလ ၈ ရက်နှောင်းပိုင်းတွင် ပြောကြားခဲ့သည်ဟု Anadolu Agency သတင်းဌာနက ဖော်ပြခဲ့ပါသည်။ ကိုဆိုဗိုရဲတပ်ဖွဲ့၏ ဆာ့ဘ်မဟုတ်သော တပ်ဖွဲ့များသည် အယ်ဘေးနီးယားလူမျိုးများနှင့် ဘော့စနီးယားလူမျိုးများ၏ လုံခြုံရေး သေချာမှုရှိစေရန်အတွက် မီထရိုဗီကာ (Mitrovica) မြို့၏ မြောက်ပိုင်းဒေသများသို့ စတင်ဝင်ရောက်လာခဲ့ခြင်းဖြစ်ကြောင်း ဒေသတွင်းမီဒီယာများက ဖော်ပြခဲ့ကြပါသည်။ ယခုသီတင်းပတ်တွင် ကိုဆိုဗိုအတွင်းရှိ လူမျိုးပေါင်းစုံနေထိုင်ရာနေရာများ၌ တိုက်ခိုက်မှုများ ဆက်တိုက်ဖြစ်ပွားခဲ့သည့်အပြင် ဆာ့ဘ်လူမျိုးစုမဟုတ်သူများအနေဖြင့်လည်း ခြိမ်းခြောက် မှုများခံစားခဲ့ရသောကြောင့် လုံခြုံရေးအစီအမံများ ပြုလုပ်ထားပြီး ယခုအခါ အခြေအနေ တည်ငြိမ်လျက်ရှိကြောင်း ပြည်ထဲရေးဝန်ကြီး ရှီလာဆီကလာ (Xhelal Svecla) က ကြေညာ ခဲ့ပါသည်။ ကိုဆိုဗိုရဲတပ်ဖွဲ့သည် လုံခြုံရေးနှင့် တည်ငြိမ်မှုကိုထိန်းသိမ်းရန် တာဝန်ရှိသည် ဟုလည်း ၎င်းက ပြောကြားခဲ့ပါသည်။
မကြာသေးမီရက်များအတွင်း နိုင်ငံမြောက်ပိုင်းရှိ ရဲအရာရှိများနှင့် ပြည်သူများ အကြား လက်နက်ကိုင်တိုက်ခိုက်မှုများ ဆက်တိုက်ဖြစ်ပွားခဲ့ခြင်းကြောင့် နိုင်ငံသား အားလုံး၏ လုံခြုံရေးကို အထောက်အပံ့ဖြစ်စေရန် ရဲတပ်ဖွဲ့ဝင်များတိုးမြှင့်ချထားရန် လိုအပ်သည်ဟု ယူဆထားကြောင်းလည်း ဆီကလာက ပြောကြားခဲ့ပါသည်။ ထိုကဲ့သို့ ရဲတပ်ဖွဲ့ဝင်များ တိုးမြှင့်ချထားသွားမည်ဖြစ်သည့်အတွက် ပြည်သူများအနေဖြင့် စိတ်အေးချမ်းသာစွာ နေထိုင်ကြရန်လည်း ၎င်းက တိုက်တွန်းပြောကြားခဲ့ပါသည်။ ထို့ပြင် နိုင်ငံသားအားလုံးအတွက် ခွဲခြားမှုမရှိသည့်စည်းမျဉ်းစည်းကမ်းနှင့် လုံခြုံရေးဆိုင်ရာ ကတိကဝတ်များရှိခြင်းကြောင့် ကိုဆိုဗိုရဲတပ်ဖွဲ့နှင့် တည်ငြိမ်အေးချမ်းစွာ ပူးပေါင်း ဆောင်ရွက်ကြရန်လည်း ၎င်းက နိုင်ငံသားအားလုံးကို တောင်းဆိုခဲ့ပါသည်။ စစ်ဝတ်စုံ အပြည့်နှင့် ကိုဆိုဗိုရဲတပ်ဖွဲ့ဝင် ၃၀၀ ဦးမှ ၃၅၀ ဦးအကြားသည် သံချပ်ကာယာဉ်များဖြင့် ကိုဆိုဗိုမြောက်ပိုင်းသို့ရောက်ရှိလာခဲ့ကြောင်း ကိုဆိုဗိုဆိုင်ရာဆားဘီးယားအစိုးရ ကော်မရှင်နာ အကြီးအကဲ ပီတာပတ်ကိုဗစ် (Petar Petkovic) က သတင်းစာရှင်းလင်းပွဲတစ်ခုတွင် ပြောကြားခဲ့ပါသည်။ Brussels သဘောတူညီချက်အရ ကိုဆိုဗိုရဲတပ်ဖွဲ့များသည် မြောက်ဘက်ပိုင်းတွင် တပ်ဖြန့်ချထားခွင့်မရှိကြောင်းလည်း ၎င်းက ပြောကြားခဲ့သည်ဟု သိရှိရပါသည်။
No comments:
Post a Comment