ပိုလန်နိုင်ငံသည် တင့်ကား ၃၂၅ စီးနှင့် MiG-29 တိုက်လေယာဉ် ၁၄ စီးအား ယူကရိန်းနိုင်ငံသို့ပေးပို့ခဲ့ခြင်း

 ပိုလန်နိုင်ငံသည် တင့်ကား ၃၂၅ စီးနှင့် MiG-29 တိုက်လေယာဉ် ၁၄ စီးအား ယူကရိန်းနိုင်ငံသို့ပေးပို့ခဲ့သည်ဟု ဥရောပသမဂ္ဂဆိုင်ရာ ပိုလန်နိုင်ငံ၏ အမြဲတမ်းကိုယ်စားလှယ်က ၎င်း၏တွစ်တာစာမျက်နှာတွင် ဖော်ပြခဲ့ကြောင်း NV သတင်းဌာနက မေလ ၁၂ ရက်တွင် ဖော်ပြခဲ့ပါသည်။ ယူကရိန်းနိုင်ငံသို့ပေးပို့ခဲ့သည့် တင့်ကားစုစုပေါင်း ၅၇၅ စီးအနက် ပိုလန်နိုင်ငံက ၃၂၅ စီးဖြင့် အများဆုံးပေးပို့ခဲ့ခြင်းဖြစ်ပြီး ၎င်းနောက်တွင် နယ်သာလန် နိုင်ငံက ၈၅ စီး၊ ဂျာမနီနိုင်ငံက ၈၀ စီးနှင့် အမေရိကန်နိုင်ငံက ၇၆ စီးတို့ကို အသီးသီး ပေးပို့ခဲ့ကြောင်း ၎င်းက ဆက်လက်ဖော်ပြခဲ့ပါသည်။ ထို့ပြင် ယူကရိန်းနိုင်ငံသည် အရှေ့ပိုင်းနှင့် တောင်ပိုင်းရှိ ရုရှားတပ်ဖွဲ့များကို တန်ပြန်ထိုးစစ်ဆင်နိုင်ရေးအတွက် အမေရိကန်ဒေါ်လာ ၃၀ ဘီလီယံတန်ဖိုးရှိ စစ်လက်နက်များကို မဟာမိတ်နိုင်ငံများထံမှ လက်ခံရရှိပြီးဖြစ်ကြောင်း Bloomberg သတင်းဌာန၏ ဖော်ပြချက်အရ သိရှိရပါသည်။