ချက်သမ္မတနိုင်ငံ၏ ဘဏ္ဍာရေးလိုငွေပြမှု မြင့်တက်လာခဲ့ခြင်း

Xinhua; Jun-11 (Thu)

              ကိုရိုနာဗိုင်းရပ်စ်ကပ်ရောဂါကူးစက်မှု၏ အကျိုးသက်ရောက်မှုများကြောင့် ချက်သမ္မတနိုင်ငံ၏ ဘဏ္ဍာရေးလိုငွေပြမှုမှာ ၂၀၂၀ ပြည့်နှစ်တွင် ချက်ကာရူနား ၅၀၀ ဘီလီယံ (အမေရိကန်ဒေါ်လာ ၂၁.၃ ဘီလီယံ) အထိ မြင့်တက်လာခဲ့ကြောင်း ဘဏ္ဍာရေး ဝန်ကြီးဌာနက ဇွန်လ ၉ ရက်တွင် အတည်ပြုပြောကြားခဲ့ပါသည်။ ချက်သမ္မတနိုင်ငံ သည် ၂၀၂၀ ပြည့်နှစ်အတွက် ဝင်ငွေခွန် ချက်ကာရူနား ၁.၃၆ ထရီလီယံခန့်ရရှိရန်နှင့် ချက်ကာရူနား ၁.၈၆ ထရီလီယံသုံးစွဲသွားရန် ခန့်မှန်းထားရှိမှုကို ပြင်ဆင်ခဲ့ရပါသည်။ ချက်သမ္မတနိုင်ငံသည် ရင်းနှီးမြှုပ်နှံမှုများ၊ အထူးသဖြင့် ဒေသများနှင့်မြို့များရှိ ရင်းနှီး မြှုပ်နှံမှုစီမံကိန်းများအတွက် အများဆုံးအသုံးပြုသွားရန်ရည်ရွယ်၍ ယခင်ခန့်မှန်းထားရှိ မှုကို ပြင်ဆင်ခဲ့ရခြင်းဖြစ်ကြောင်း ဘဏ္ဍာရေးဝန်ကြီး အယ်လီနာချီလာရိုဗာ (Alena Schillerova) က ပြောကြားခဲ့ပါသည်။

              ကိုရိုနာဗိုင်းရပ်စ်ကူးစက်ရောဂါသည် နိုင်ငံ၏စီးပွားရေးဆိုင်ရာ ဆောင်ရွက်ချက် များကို သိသိသာသာထိခိုက်စေခဲ့ပြီး ဝင်ငွေခွန်ရရှိမှုများမှာလည်း ကျဆင်းခဲ့ရပါသည်။ ကူးစက်ရောဂါတိုက်ဖျက်ရန်နှင့် စီးပွားရေးကဏ္ဍတွင် အထောက်အကူဖြစ်စေနိုင်ရန် အတွက် နိုင်ငံတော်ဘဏ္ဍာရေးအသုံးစရိတ်မှ တိုးမြှင့်သုံးစွဲသွားရန်လိုအပ်ကြောင်း အဆိုပါ ဝန်ကြီးဌာနက ပြောကြားခဲ့ပါသည်။ ချက်သမ္မတနိုင်ငံသည် ၂၀၂၀ ပြည့်နှစ်အတွက် နိုင်ငံတော်ဘဏ္ဍာရေးဆိုင်ရာအက်ဥပဒေကိုလည်း ၂ ကြိမ်တိုင်တိုင် ပြင်ဆင်မှုပြုလုပ်ခဲ့ ပါသည်။ ဘဏ္ဍာရေးလိုငွေပြမှုမှာ ယခင်က ချက်ကာရူနား ၄၀ ဘီလီယံရှိရာမှ ၃၀၀ ဘီလီယံအထိ မြင့်တက်လာခဲ့ရပါသည်။ သို့သော်လည်း ဝင်ငွေခွန်ကျဆင်းလာခြင်းနှင့် အစိုးရထောက်ပံ့မှုအစီအစဉ်များအပေါ် သက်ရောက်မှုများကြောင့် ထိုပြင်ဆင်ချက်များမှာ လုံလောက်ခြင်းမရှိခဲ့ဘဲ ထပ်မံပြင်ဆင်မှုများပြုလုပ်ရန်လိုအပ်ကြောင်း ဘဏ္ဍာရေးဝန်ကြီး ဌာနက ပြောကြားခဲ့သည်ဟု သိရှိရပါသည်။