ဂရိနိုင်ငံအနေဖြင့် ၎င်းနိုင်ငံရှိ တူကီယဲလူနည်းစုများ၏ အခွင့်အရေးများအပေါ် လေးစားလိုက်နာရန်လိုကြောင်း တူကီယဲနိုင်ငံခြားရေးဝန်ကြီးဌာနက ထုတ်ပြန်ခဲ့ခြင်း

 

Anadolu Agency;Sep-6(Tue)

              ဂရိနိုင်ငံအနေဖြင့် ၎င်းနိုင်ငံရှိ Western Thrace ဒေသတွင်နေထိုင်သော တူကီယဲ လူနည်းစုများ၏အခွင့်အရေးများနှင့် ဘာသာရေးခေါင်းဆောင်ရွေးချယ်တင်မြှောက် ပိုင်ခွင့်ကို လေးစားလိုက်နာရန်လိုကြောင်း တူကီယဲနိုင်ငံခြားရေးဝန်ကြီးဌာနက စက်တင်ဘာလ ၅ ရက်တွင် ထုတ်ပြန်ထားပါသည်။ ထို့ပြင် Western Thrace ဒေသတွင်နေထိုင်သော တူကီယဲလူနည်းစုများ၏အခွင့်အရေးကို အကာအကွယ်ပေးရေး ကတိကဝတ်များပါဝင်သည့် Lausanne ငြိမ်းချမ်းရေးသဘောတူစာချုပ်ကဲ့သို့သော နိုင်ငံတကာသဘောတူညီချက် များကို လေးစားလိုက်နာရန်နှင့် ဘာသာရေးခေါင်းဆောင်ရွေးချယ်တင်မြှောက်ခြင်းဆိုင်ရာ ကိစ္စရပ်များတွင် ဖိအားပေးဆောင်ရွက်နေမှုများအား ရပ်တန့်ပေးရန် တူကီယဲနိုင်ငံခြားရေး ဝန်ကြီးဌာန၏ထုတ်ပြန်ချက်တွင် တိုက်တွန်းရေးသားထားပါသည်။ တူကီယဲနိုင်ငံအနေဖြင့် ဂရိနိုင်ငံရှိ တူကီယဲလူနည်းစုများ၏ ရွေးချယ်ခြင်းခံရသည့် ဘာသာရေးခေါင်းဆောင်နှင့် ၎င်း၏အခွင့်အရေးများအပေါ် ရပ်တည်ပေးသွားမည်ဖြစ်ကြောင်းကိုလည်း ၎င်းထုတ်ပြန်ချက် တွင် ဖော်ပြထားပါသည်။  

          ဂရိနိုင်ငံသည် တူကီယဲလူနည်းစုများအပေါ် နှိပ်စက်ညှဉ်းပန်းမှုများနှင့် အခွင့်အရေး ချိုးဖောက်မှုများအပါအဝင် အသင်းအဖွဲ့များ၏အမည်များတွင် “တူကီယဲ” ဟူသော စကားလုံးကိုတားမြစ်ခြင်းနှင့် တူကီယဲကျောင်းများကိုပိတ်ပင်ခြင်းတို့ ဆောင်ရွက်လျက် ရှိကြောင်း သတင်းဌာနတွင် ဖော်ပြထားပါသည်။ ထို့ပြင် အဆိုပါဒေသရှိ ဘာသာရေး ခေါင်းဆောင်များအား ဂရိအစိုးရက တိုက်ရိုက်ခန့်အပ်မှုများလုပ်ဆောင်လျက်ရှိသော်လည်း ဒေသခံမွတ်စလင်များသည် ၎င်းဘာသာရေးခေါင်းဆောင်များအား အသိအမှတ်ပြုခြင်း မရှိဘဲ ၎င်းတို့ကိုယ်တိုင် ဘာသာရေးခေါင်းဆောင်များကို ရွေးချယ်မှုများလုပ်ဆောင်လျက် ရှိပါသည်။ အဆိုပါဒေသခံမွတ်စလင်များ ရွေးချယ်တင်မြှောက်သည့် ဘာသာရေး ခေါင်းဆောင်များကို လည်း ဂရိနိုင်ငံက အသိအမှတ်ပြုခြင်းမရှိကြောင်းနှင့် Western Thrace ဒေသ၌ ဘာသာရေး ခေါင်းဆောင်သည် ၎င်းဒေသရှိ တူကီယဲမွတ်စလင် အသိုင်းအဝိုင်း အတွက် မိသားစုနှင့် အမွေဆက်ခံမှုဆိုင်ရာကိစ္စရပ်များကို  တရားဝင်စီရင်ဆုံးဖြတ် ပိုင်ခွင့်ရှိကြောင်း သိရှိရပါသည်။