ယူကရိန်းသမ္မတသည် ချက်သမ္မတနိုင်ငံသို့ ရောက်ရှိလျက်ရှိခြင်း

     ယူကရိန်းသမ္မတ ဗိုလိုဒီမာဇီလန်စကီး (Volodymyr Zelensky) သည် ချက်သမ္မတ နိုင်ငံ၊ မြို့တော် ပရာ့ဂ် (Prague) သို့ ရောက်ရှိလျက်ရှိပြီး သမ္မတ ပီတာပါဗယ်လ် (Petr Pavel) နှင့် တွေ့ဆုံဆွေးနွေးမှုများပြုလုပ်ခဲ့ကြောင်း Xinhua သတင်းဌာနက ဇူလိုင်လ ၇ ရက်တွင် ဖော်ပြခဲ့ပါသည်။ လစ်သူရေးနီးယားနိုင်ငံ၊ မြို့တော် ဗီလ်နီးယပ်စ် (Vilnius) တွင် ကျင်းပမည့် NATO အဖွဲ့ထိပ်သီးအစည်းအဝေးတွင် ယူကရိန်းနိုင်ငံ၏ လက်ရှိဖြစ်ပေါ်လျက် ရှိသောအခြေအနေ၊ ဘီလာရုဇ်နိုင်ငံ၌ လက်ရှိဖြစ်ပေါ်ပြောင်းလဲမှုများနှင့် ယူကရိန်းစစ်ပြီးခေတ် ပြန်လည်တည်ဆောက်ရေးတွင် ချက်သမ္မတနိုင်ငံမှ ပါဝင်ပတ်သက်မှုများနှင့်စပ်လျဉ်း၍ သမ္မတနှစ်ဦးက ဆွေးနွေးခဲ့ကြပါသည်။ အဆိုပါတွေ့ဆုံဆွေးနွေးမှုအတွင်း ချက်နိုင်ငံအနေဖြင့် ယူကရိန်းအတွက် အမေရိကန်ဒေါ်လာ ၂.၁ ဘီလီယံထောက်ပံ့ပေးခဲ့ပြီးဖြစ်ကြောင်း ချက်သမ္မတက ပြောကြားခဲ့သည်ဟု သိရှိရပါသည်။