တူရကီသည် အီရန်နှင့်ထိစပ်လျက်ရှိသောနယ်စပ်ဒေသအား ပိတ်ပင်သွားမည်ဆိုခြင်း

 

Tass; Feb-24(Mon)

              တူရကီနိုင်ငံသည် အီရန်နိုင်ငံအတွင်း ကိုရိုနာဗိုင်းရပ်စ် (Coronavirus) ကူးစက် ပျံ့နှံ့လျက်ရှိသည့်အတွက် အီရန်နိုင်ငံနှင့် ထိစပ်လျက်ရှိသော ၎င်း၏နယ်စပ်ဒေသအား ပိတ်ပင်သွားမည်ဖြစ်ကြောင်း တူရကီပြည်ထဲရေးဝန်ကြီးဌာနက ဖေဖော်ဝါရီလ ၂၃ ရက်တွင် ထုတ်ပြန်ကြေညာခဲ့ပါသည်။ တူရကီနိုင်ငံသည် အီရန်နိုင်ငံအတွင်း ကိုရိုနာဗိုင်းရပ်စ်ကူးစက် ပျံ့နှံ့မှုကြောင့် အီရန်နိုင်ငံနှင့် ကုန်စည်သယ်ယူပို့ဆောင်ရေးလုပ်ငန်းများ၊ အထူးသဖြင့် လေယာဉ်ပျံသန်းမှုများ၊ မီးရထားများနှင့် မော်တော်ယာဉ်များ ဖြတ်သန်းသွားလာမှုကို ရပ်ဆိုင်းခဲ့ကြောင်း တူရကီကျန်းမာရေးဝန်ကြီး ဖာရက်တင်ကိုကာ (Fahrettin Koca) က ပြောကြားခဲ့ပါသည်။ အီရန်နိုင်ငံတွင် ပထမဆုံးကိုရိုနာဗိုင်းရပ်စ်ကူးစက်ခံရကြောင်းကို ဖေဖော်ဝါရီလ ၁၉ ရက်၌ အတည်ပြုထားရှိပြီးဖြစ်ပါသည်။

              အီရန်နိုင်ငံတွင် ကိုရိုနာဗိုင်းရပ်စ်ကူးစက်ခံထားရသူအရေအတွက်သည် ၄၃ ဦး အထိရောက်ရှိခဲ့ပြီး သေဆုံးသူအရေအတွက်သည် ၈ ဦးအထိရောက်ရှိခဲ့ကြောင်း အီရန် နိုင်ငံက တရားဝင်ထုတ်ပြန်ထားရှိပါသည်။ ကိုရိုနာဗိုင်းရပ်စ်သည် ၂၀၁၉ ခုနှစ်၊ ဒီဇင်ဘာလ နှောင်းပိုင်းတွင် တရုတ်နိုင်ငံ၊ ဝူဟန် (Wuhan) မြို့၌ စတင်ဖြစ်ပွားခဲ့ခြင်းဖြစ်ပါသည်။ ကမ္ဘာ့ကျန်းမာရေးအဖွဲ့ကလည်း ကိုရိုနာဗိုင်းရပ်စ်ကူးစက်ပျံ့နှံ့မှုနှင့်စပ်လျဉ်း၍ ပြည်သူ့ ကျန်းမာရေးအရေးပေါ် အခြေအနေတစ်ခုအဖြစ် ထုတ်ပြန်ကြေညာထားပါသည်။ နောက်ဆုံး သတင်းများအရ တရုတ်နိုင်ငံတွင် ကိုရိုနာဗိုင်းရပ်စ်ကူးစက်ပျံ့နှံ့ခံရသူ ၇၇,၀၀၀ ကျော် ရှိပြီး သေဆုံးသူ ၂,၄၄၂ ဦးအထိမြင့်တက်ခဲ့ကြောင်း သိရှိရပါသည်။