ရုရှားကိုယ်စားလှယ်အဖွဲ့သည် အိုင်ဒဲလစ်စီရင်စုအရေးဆွေးနွေးရန်အတွက် တူရကီသို့ လာရောက်မည်ဖြစ်ကြောင်း တူရကီသမ္မတက ပြောကြားခဲ့ခြင်း

 

Xinhua; Feb-25(Tue)

              ရုရှားကိုယ်စားလှယ်အဖွဲ့တစ်ဖွဲ့သည် ဆီးရီးယားနိုင်ငံအနောက်မြောက်ပိုင်း အိုင်ဒဲလစ် (Idlib) စီရင်စုရှိ အခြေအနေများကိုဆွေးနွေးရန်အတွက် ဖေဖော်ဝါရီလ ၂၆ ရက် တွင် တူရကီနိုင်ငံသို့ လာရောက်မည်ဖြစ်ကြောင်း တူရကီသမ္မတ ရီဆတ်တေရစ် အာဒိုဂန် (Recep Tayyip Erdogan) က ဖေဖော်ဝါရီလ ၂၅ ရက်၌ ပြောကြားခဲ့ပါသည်။ ထို့ပြင် အာဒိုဂန်က မိမိတို့အနေဖြင့် အိုင်ဒဲလစ်စီရင်စုကိစ္စရပ်အား လျင်မြန်စွာဖြေရှင်းရန် လိုအပ်ကြောင်းနှင့် ရုရှားအနေဖြင့် လေကြောင်းအထောက်အပံ့အပါအဝင် ဆီးရီးယား အစိုးရအား အကူအညီအများအပြားပေးအပ်လျက်ရှိကြောင်း ထပ်လောင်းပြောကြား ခဲ့ပါသည်။ တူရကီနှင့် ရုရှားနိုင်ငံတို့မှ အစိုးရအရာရှိများသည် လွန်ခဲ့သောသီတင်းပတ် အနည်းငယ်တွင် အန်ကာရာနှင့် မော်စကိုမြို့တို့၌ ဆွေးနွေးမှု ၂ ကြိမ်ပြုလုပ်ခဲ့သော်လည်း ရလဒ်ကောင်းများ ထွက်ပေါ်ခဲ့ခြင်းမရှိကြောင်း သိရှိရပါသည်။

              ဂျာမနီ၊ ပြင်သစ်နှင့် ရုရှားနိုင်ငံတို့မှ ခေါင်းဆောင်များအနေဖြင့် ဆီးရီးယား အရေးနှင့်ပတ်သက်၍ ၄ ပွင့်ဆိုင်ညီလာခံပြုလုပ်ရေးအား ဆုံးဖြတ်ချက်ချမှတ်နိုင်ခြင်း မရှိသေးကြောင်း၊ သို့သော်လည်း မိမိအနေဖြင့်မူ မတ်လ ၅ ရက် နောက်ဆုံးထား၍ ရုရှားသမ္မတ ဗလာဒီမာပူတင်နှင့် တွေ့ဆုံဆွေးနွေးရန် လိုအပ်လျက်ရှိကြောင်း အာဒိုဂန် က ပြောကြားခဲ့ပါသည်။ အိုင်ဒဲလစ်စီရင်စုကိစ္စရပ်အပြင် လစ်ဗျားနိုင်ငံရှိ အခြေအနေ များသည်လည်း ရုရှားနှင့်တူရကီအကြား ဆွေးနွေးမှုများပြုလုပ်နေရသည့် ကိစ္စရပ် တစ်ခုဖြစ်သည်ဟု အာဒိုဂန်က ပြောကြားခဲ့ကြောင်း သိရှိရပါသည်။