ချက်သမ္မတနိုင်ငံသည် ပိုလန်-ဘီလာရုဇ်နယ်စပ်သို့ တပ်ဖွဲ့ဝင်များ စေလွှတ်သွားမည်ဆိုခြင်း

 

Thehill;Dec-9(Thu)

              ရွှေ့ပြောင်းဒုက္ခသည်များဆိုင်ရာပဋိပက္ခများ ဆက်လက်ဖြစ်ပွားလျက်ရှိသည့် ပိုလန်-ဘီလာရုဇ်နယ်စပ်သို့ တပ်ဖွဲ့ဝင် ၁၅၀ ဦး စေလွှတ်သွားမည်ဖြစ်ကြောင်း ချက် အစိုးရက ဒီဇင်ဘာလ ၈ ရက်တွင် ပြောကြားခဲ့ပါသည်။ အက်စတိုးနီးယားနှင့် ဗြိတိန် နိုင်ငံတို့အနေဖြင့် ပိုလန်-ဘီလာရုဇ်နယ်စပ်သို့ ၎င်းတို့၏ တပ်ဖွဲ့ဝင် ၁၀၀ ဦးစီ စေလွှတ် ခဲ့ပြီးနောက် ချက်သမ္မတနိုင်ငံအနေဖြင့် အထက်ပါအတိုင်း စီစဉ်ခဲ့ခြင်းဖြစ်ပါသည်။ ပိုလန်-ဘီလာရုဇ်နယ်စပ်သို့ တပ်ဖွဲ့ဝင်များစေလွှတ်သွားမည့်ကိစ္စရပ်အား လွှတ်တော် နှစ်ရပ်စလုံး၏ အတည်ပြုချက်ရရှိရန် လိုအပ်မည်ဖြစ်ကြောင်းနှင့် အတည်ပြုချက်ရရှိပါက တပ်ဖွဲ့ဝင် ၁၅၀ ဦးအား ၎င်းနယ်စပ်တွင် ရက်ပေါင်း ၁၈၀ ကြာ တာဝန်ထမ်းဆောင်ရန် စေလွှတ်သွားမည်ဖြစ်ကြောင်း ချက်ကာကွယ်ရေးဝန်ကြီး လူဘိုမီယာမက်နာ (lubomir Metnar) က ၎င်း၏ တွစ်တာစာမျက်နှာတွင် ရေးသားဖော်ပြခဲ့ပါသည်။

              အရှေ့အလယ်ပိုင်းဒေသများမှ ထောင်နှင့်ချီသော ရွှေ့ပြောင်းဒုက္ခသည်များသည် ဥရောပသမဂ္ဂအဖွဲ့ဝင်နိုင်ငံများသို့ဝင်ရောက်ရန်အတွက် အဆိုပါနိုင်ငံအချို့နှင့် နယ်နိမိတ်ချင်း ထိစပ်လျက်ရှိသည့် ဘီလာရုဇ်နယ်စပ်သို့ စုရုံးရောက်ရှိလျက်ရှိပါသည်။ ထိုအခြေအနေ တွင် ဘီလာရုဇ်အစိုးရအနေဖြင့် ၎င်းဒုက္ခသည်များအား ပိုလန်၊ လစ်သူရေးနီးယားနှင့် လတ်ဗီးယား အစရှိသည့် ဥရောပသမဂ္ဂအဖွဲ့ဝင်နိုင်ငံများဆီသို့ တရားမဝင်ဖြတ်ကျော် ဝင်ရောက်ရန် တိုက်တွန်းမှုများပြုလုပ်ခဲ့ကြောင်း သတင်းများထွက်ပေါ်လျက်ရှိပါသည်။ ဘီလာရုဇ်သမ္မတ အလက်ဇန္ဒားလူကာရှန်ကို (Alexander Lukashenko) သည် ၎င်း၏ အစိုးရအပေါ်ချမှတ်ထားသော အရေးယူပိတ်ဆို့မှုများကို တုံ့ပြန်နိုင်ရန်အတွက် ရွှေ့ပြောင်း ဒုက္ခသည်များကို နိုင်ငံရေးရည်ရွယ်ချက်ရှိရှိဖြင့် လက်နက်တစ်ခုသဖွယ်အသုံးပြုနေခြင်း ဖြစ်သည်ဟု ဥရောပသမဂ္ဂက စွပ်စွဲပြောကြားမှုများပြုလုပ်ထားကြောင်း သိရှိရပါသည်။

သုံးသပ်ချက်

              အရှေ့အလယ်ပိုင်းနှင့် အာဖရိကဒေသတို့မှ တရားမဝင်ရွှေ့ပြောင်းအခြေချ နေထိုင်သူများအား ဘီလာရုဇ်နယ်စပ်မှတစ်ဆင့် ပိုလန်၊ လက်ဗီးယားနှင့် လစ်သူရေးနီးယား နိုင်ငံများသို့ပို့ဆောင်ရန် ဆောင်ရွက်ခဲ့ခြင်းကြောင့် ဥရောပသမဂ္ဂနှင့် ဘီလာရုဇ်နိုင်ငံ အကြား ပဋိပက္ခဖြစ်ပွားလာခြင်းဖြစ်ပါသည်။ ဘီလာရုဇ်နိုင်ငံအနေဖြင့် ၎င်းဒုက္ခသည် များကို ပိုလန်နယ်စပ်သို့ပို့ဆောင်၍ ဥရောပသမဂ္ဂအား ဖိအားပေးခြိမ်းခြောက်နေသည့် အဓိကရည်ရွယ်ချက်မှာ ဥရောပသမဂ္ဂက ဘီလာရုဇ်အပေါ်ချမှတ်ထားသည့် အရေးယူ ပိတ်ဆို့မှုများကို ပြန်လည်ရုပ်သိမ်းစေရန်နှင့် ပူးပေါင်းဆောင်ရွက်မှုများ ပြန်လည် လုပ်ဆောင်စေရန်တို့ကြောင့်ဖြစ်ပါသည်။ ဘီလာရုဇ်နိုင်ငံသည် တရားမဝင်ရွှေ့ပြောင်း အခြေချနေထိုင်သူများကို လူသားလက်နက်တစ်ခုအဖြစ်အသုံးပြုလျက် မျိုးစပ်စစ်ပွဲဖန်တီး နေကြောင်း ဥရောပသမဂ္ဂက ပြစ်တင်ပြောကြားခဲ့ပြီး ဥရောပခေါင်းဆောင်များကိုလည်း အကျပ်အတည်းတွေ့စေခဲ့သည့် ကိစ္စရပ်တစ်ခုဖြစ်လာကြောင်း တွေ့ရှိရပါသည်။ ဥရောပ နိုင်ငံများအနေဖြင့် အဆိုပါရွှေ့ပြောင်းဒုက္ခသည်များအရေးနှင့်ပတ်သက်သည့် စိုးရိမ်ပူပန်မှု များကြောင့် အက်စတိုးနီးယားနှင့် ဗြိတိန်နိုင်ငံတို့သည် တပ်ဖွဲ့ဝင် ၁၀၀ ဦးစီအား ပိုလန် နိုင်ငံသို့ အသီးသီးစေလွှတ်ခဲ့ကြပါသည်။ ယခုအခါ ချက်သမ္မတနိုင်ငံအနေဖြင့်လည်း ၎င်း၏တပ်ဖွဲ့ဝင် ၁၅၀ ဦးအား စေလွှတ်သွားမည်ဖြစ်ကြောင်းနှင့် ရက်ပေါင်း ၁၈၀ ကြာ တာဝန်ထမ်းဆောင်စေမည်ဖြစ်ကြောင်း ထုတ်ပြန်ကြေညာခဲ့ပါသည်။ ဥရောပနိုင်ငံအသီးသီးမှ ပိုလန်နယ်စပ်သို့ တပ်ဖွဲ့ဝင်များစေလွှတ်ပေးခြင်းကြောင့် ဥရောပ-ဘီလာရုဇ်အကြား ရွှေ့ပြောင်းဒုက္ခသည်များ နယ်စပ်ဖြတ်ကျော်မှုပြဿနာမှာ အထိုက်အလျောက်တည်ငြိမ် သွားနိုင်ဖွယ်ရှိသော်လည်း ဒေသတွင်းအင်အားကြီးနိုင်ငံများ၏ ဝင်ရောက်စွက်ဖက်မှုများ နှင့်အတူ ဥရောပသမဂ္ဂ၏ ဘီလာရုဇ်အပေါ် အရေးယူပိတ်ဆို့မှုများ ဆက်လက်တိုးမြှင့် လုပ်ဆောင်နေပါက တင်းမာမှုများမှာ အဆုံးသတ်သွားနိုင်ဖွယ်မရှိကြောင်း သုံးသပ်တင်ပြ အပ်ပါသည်။