ဂရိစစ်ဘက်သည် အမေရိကန်ဒေါ်လာ ၁ ဘီလီယံတန်ဖိုးရှိ M1117 သံချပ်ကာ လုံခြုံရေးယာဉ်များအား လက်ဆောင်ရရှိခဲ့ခြင်း

 

Greekcitytimes; Dec-3 (Fri)

              ဂရိစစ်ဘက်၏ အမှတ် ၃၀၁ ကာကွယ်ရေးပစ္စည်းထုတ်လုပ်သည့်စက်ရုံ၌  ဒီဇင်ဘာလ ၂ ရက်က ပြုလုပ်ခဲ့သည့်အခမ်းအနားတစ်ခုအတွင်း ဂရိစစ်ဘက်အနေဖြင့် အမေရိကန်ထံမှ M1117 သံချပ်ကာလုံခြုံရေးယာဉ်(Armored Security Vehicle-ASV)  ၁,၂၀၀ အနက် ပထမအသုတ်အဖြစ် ၄၄ စီးကို လက်ခံရရှိခဲ့ကြောင်း ဂရိနိုင်ငံပိုင် Kathimerini နေ့စဉ်သတင်းစာက ဒီဇင်ဘာလ ၃ ရက်တွင် ဖော်ပြခဲ့ပါသည်။ ဂရိ စစ်ဘက်အနေဖြင့် ကာကွယ်ရေးအပိုပစ္စည်းများ အသုံးချရေးအစီအစဉ် (Excess Defense Articles Program)အရ အမေရိကန်ထံမှ M1117 ASV အစီးရေ ၁,၂၀၀ ကို လက်ဆောင်အဖြစ် လက်ခံရရှိမည်ဖြစ်ကြောင်း အဆိုပါသတင်းစာ၌ ဖော်ပြထားပါသည်။

              အဆိုပါ M1117 သံချပ်ကာလုံခြုံရေးယာဉ်များသည် ဂရိစစ်ဘက်အတွက် စစ်ဆင်ရေးလုပ်ငန်းများဆောင်ရွက်ရာတွင် များစွာအထောက်အပံ့ဖြစ်စေမည်ဖြစ်ကြောင်း ဂရိကာကွယ်ရေးဝန်ကြီး နီကိုးလက်စ်ပန်ဂျီအိုတိုပိုလက်စ် (Nikos Panagiotopoulos) က ပြောကြားခဲ့ပါသည်။ ဂရိနိုင်ငံ၏ပထဝီနိုင်ငံရေးအခြေအနေ၊ အရှေ့မြေထဲပင်လယ်၊ အေဂျီယန်ပင်လယ်အပါအဝင် ဒေသတွင်းခြိမ်းခြောက်မှုများနှင့် ရင်ဆိုင်နေရသည့်အတွက် ဂရိနိုင်ငံအနေဖြင့် အမြဲတမ်းစစ်ရေးသတိရှိရန်နှင့် မြင့်မားသောကာကွယ်ရေးစွမ်းရည်ရှိရန် လုပ်ဆောင်ရမည်ဖြစ်ကြောင်း ၎င်းကထပ်လောင်းပြောကြားခဲ့ပါသည်။ ဂရိစစ်ဘက် အနေဖြင့် စုစုပေါင်း M1117 ASV အစီးရေ ၁,၂၀၀ အနက် နောက်ထပ် M1117 ASV အစီး ၄၀၀ ကျော်ကို လာမည့် ၂၀၂၂ ခုနှစ် အစောပိုင်းတွင် အမေရိကန်ထံမှ ထပ်မံလက်ခံ ရရှိသွားမည်ဖြစ်ကြောင်း သိရှိရပါသည်။