ဂရိနိုင်ငံသည် ၎င်း၏ရေတပ်အားအဆင့်မြှင့်တင်ရန် အမေရိကန်ဒေါ်လာများစွာကုန်ကျမည့် အဆိုပြုချက်အား အတည်ပြုခဲ့ခြင်း

 

Thedefensepost; Feb-28 (Mon)

     ဂရိနိုင်ငံအနေဖြင့် ၎င်း၏ရေတပ်အား နှစ် ၂၀ အတွင်း ခေတ်မီရေတပ်မတော် တစ်ခုအဖြစ်ရောက်ရှိလာစေရန် လုပ်ဆောင်သွားမည်ဖြစ်ရာ ရေတပ်ဆိုင်ရာအဆင့်မြှင့် တင်ခြင်းများ ပြုလုပ်သွားရန်အတွက် အမေရိကန်ဒေါ်လာဘီလီယံများစွာ သုံးစွဲမည့် အဆိုပြုချက်အား ဂရိအစိုးရက အတည်ပြုခဲ့သည်ဟု Thedefensepost သတင်းဌာနက ဖေဖော်ဝါရီလ ၂၈ ရက်တွင် ဖော်ပြခဲ့ပါသည်။ ဂရိနိုင်ငံနှင့်တူရကီနိုင်ငံတို့အကြား ဖြစ်ပွား လျက်ရှိသော ရေပိုင်နက်နှင့်အချုပ်အခြာအာဏာပိုင်နယ်မြေဆိုင်ရာ အငြင်းပွားမှုများနှင့် စပ်လျဉ်း၍ တင်းမာမှုများမှာ မြင့်တက်လျက်ရှိပါသည်။ တူရကီအစိုးရအနေဖြင့် ဂရိနိုင်ငံ၏ အချုပ်အခြာအာဏာပိုင်အတွင်းရှိ တူရကီကမ်းရိုးတန်းနှင့်ထိစပ်နေသော ကျွန်းစုများအပါအဝင် ရေမိုင် ၁၂ မိုင်ကို တောင်းဆိုပါက တူရကီနှင့်ဂရိနိုင်ငံတို့အကြား စစ်ဖြစ်နိုင်မည့်အလားအလာရှိကြောင်း အဆိုပါသတင်းဌာနက ထည့်သွင်းရေးသား ဖော်ပြခဲ့ပါသည်။ ထို့ကြောင့် ဂရိအစိုးရအနေဖြင့် ၎င်းတို့နိုင်ငံ၏ရေတပ်အား အဆင့်မြှင့်တင် ခြင်းများပြုလုပ်မည့် အဆိုပြုချက်အား အတည်ပြုခဲ့ခြင်းဖြစ်ပါသည်။

      အထက်ပါဂရိအစိုးရ၏အတည်ပြုချက်အရ ဂရိနိုင်ငံသည် လာမည့် ၄ နှစ်အတွင်း ပြင်သစ်နိုင်ငံမှ Belharra ဖရီးဂိတ်စစ်ရေယာဉ် ၃ စီး ဝယ်ယူသွားရန်အတွက် အမေရိကန်ဒေါ်လာ ၂.၅၃ ဘီလီယံ သုံးစွဲသွားမည်ဖြစ်ပါသည်။ ထို့ပြင် ဂရိနိုင်ငံ အနေဖြင့် ၂၀၂၃ ခုနှစ်တွင် Belharra ဖရီးဂိတ်သင်္ဘောနှင့် ကော်ဗတ်စစ်ရေယာဉ် ၄ စီး ဝယ်ယူသွားနိုင်ဖွယ်ရှိပါသည်။ အဆိုပါ Belharra ဖရီးဂိတ်များအား ကီလိုမီတာ ၂၀၀ အတွင်းရှိ ပစ်မှတ်များကို ပစ်ခတ်နိုင်စွမ်းရှိသည့် Exocet အမျိုးအစားသင်္ဘောဖျက် ခရုဇ်ဒုံးကျည်များ တပ်ဆင်သွားမည်ဖြစ်ပြီး ၎င်းခရုဇ်ဒုံးကျည်များတွင် ရေငုပ်သင်္ဘော တိုက်ဖျက်ရေးစွမ်းရည်များလည်း ပါဝင်ပါသည်။ ထို့ပြင် ကီလိုမီတာ ၁၂၀ ထိ ပစ်ခတ် နိုင်စွမ်းရှိသည့် Aster 30 အမျိုးအစား မြေပြင်မှဝေဟင်ပစ်ဒုံးကျည်များ (Surface-to-air missiles) ကိုလည်း တပ်ဆင်သွားမည်ဖြစ်ကြောင်း သိရှိရပါသည်။